Ölkə çempionatının qalibləri mükafatlandırıldılar
24 oktyabr 2012 13:18
Bakı Otüstü Hokkey Kompleksində qadınlardan ibarət komandalar ölkə çempionatında son turun oyunlarını keçiriblər. Azerisport.az xəbər verir ki, ilk olaraq meydana vaxtından əvvəl qızıl medalları özünə təmin edən “Bakı” və Qusarın “Şahdağ” komandaları çıxıblar.
Matç gözlənildiyi kimi çempionların xeyrinə qurtarıb - 5:1. Rəqib qapısından topları Gülər Aydınlı və Aygün Muxtarova (hərəyə iki qol), daha birini isə Rəna Mehdiyeva keçirib. “Şahdağ”ın təsəlli qolunun müəllifi isə Elmira Əmiraslanova olub.
Turun 2-ci oyunu formal xarakter daşıyıb. Belə ki, son turda artıq “gümüş” medalları özünə təmin edən “Atasport-2” və “bürünc” medalların sahibi “Samur”(Qusar) komandaları qarşılaşıb. Həmin oyunda qusarlı qızların ilk hücumu qolla nəticələnib. 2-ci dəqiqədə Əsmər Şərifova fərqlənib. Paytaxt təmsilçiləri yalnız 24-cü dəqiqədə Ceyhunə Məhərrəmovanın vurduğu qolla hesabı bərabərləşdirə biliblər. Rəqiblər fasiləyə 1:1 hesabıyla yollanıblar. İkinci hissədə çempionatın “Ən sərrast hücumçusu” adını artıq özünə təmin edən Amaliya Həsənova “Samur”un qapısına daha 2 qol vuraraq komandasının 3:1 hesablı qələbəsini rəsmiləşdirib.
Beləliklə, mükafatlandırma mərasimində 10 oyunun hamısında qalib gələn “Bakı” komandası “qızıl”, rəqibindən 6 xal geri qalan “Atasport-2” komandası “gümüş”, “Samur” 10 oyundan 18 xal toplayaraq “bürünc” medallarla yanaşı, GİN-nin diplomlarına və Federasiyanın pul mükafatlarına layiq görülüblər. Yarışın Təşkilat Komitəsi müxtəlif nominasiyalar üzrə fərqlənən hokkeyçiləri də mükafatlandırıb. Gülər Aydınlı (“Bakı”) çempionatın “Ən yaxşı oyunçusu”, Samrina Məmmədrzayeva (“Samur”) “Ən yaxşı qapıçı”, Amaliya Həsənova rəqib qapılarından 22 qol keçirərək çempionatın “Ən sərrast hücumçu”su üçün təsis olunan mükafatlara sahib olublar. Sayca XI Azərbaycan çempionatında qadın otüstü hokkeyçilərin yekun yarış cədvəli aşağıdakı kimidi: