Klublarımızın rəqibləri bəlli oldu
12 sentyabr 2012 15:53
Azərbaycanın kişi və qadın otüstü hokkeyçilərdən ibarət 4 klubu 2013-cü ildə Avropa Kuboku yarışlarında iştirak edəcək. Azerisport.az xəbər verir ki, təmsilçilərimizdən ilk olaraq mübarizəyə qadınlardan ibarət "Atasport" klubu qoşulacaq.
Reytinq sıralamasına görə qitənin 8 ən güclüsü sırasına daxil olan xanım hokkeyçilərimiz Hollandiya və Almaniyanın hərəsindən 2, eləcə də İspaniya, İngiltərə və Belarus çempionları ilə yarışacaq.
Martın 29-dan aprelin 1-dək Almaniyanın Hamburq şəhərində keçiriləcək Çempionlar Kuboku turnirində ilkin mərhələdə 4 ən güclü aşkar olunacaq. 2 yarımqrupda təşkil olunacaq həmin turnirdə "Atasport" "B" qrupunda Hollandiyanın "Laren", Almaniyanın "Ram Vays Köln" və İngiltərənin "Leyçester" klubları ilə birgə yarışacaq. "A" qrupunda isə Hollandiyanın "Hertogenboş", Almaniyanın "Ulenorster ", İspaniyanın "Club de Campo Villa" və Belarusun "Ritm-Azot Grodno" komandaları ilk 2 yer uğrunda mübarizə aparacaqlar. Növbəti mərhələyə vəsiqə qazananlar "Dördlər finalını" mayın 17-dən 19-dək keçirəcəklər.
Qadın otüstü hokkeyçilərdən ibarət "Bakı" klubu Çempionlar Kubokunun "Trofi" turnirində çıxış edəcək. Yarışın keçiriləcəyi yer bəlli olmasa da rəqiblərimiz məlumdur. "B" qrupuna daxil olan qızlarımız İngiltərənin "Rudinq", Belçikanın "Royal Anverp" və Rusiyanın "İzmaylova" komandaları ilə qarşılaşacaq. Digər qrupda isə "Real Sosiedad"(İspaniya), "Railvay İnion"(İrlandiya), "Viktoriya Smoleviçi"(Belarus) və Ukraynanın "Sumçanka" hokkeyçiləri mübarizə aparacaq. Turnir 2013-cü il 17- 20 may aralığında baş tutacaq.
Bu il qitəmiqyaslı yarışlarda hərəyə bir mərhələ irəliləyən Bakının kişilərdən ibarət "Atasport" və "Akkord" klublarının da növbəti mövsümdəki rəqibləri müəyyənləşib. 2013-cü il mayın 17-dən 20-dək Çexiyanın paytaxtı Praqa şəhərində Avropa Klub Çempionatının "Çelenc I" turnirində mübarizə aparacaq "Atasport"-un "B" qrupundakı rəqibləri Uelsin "Vimçorç", Cəbəllütariqin "Eagles" və Çexiyanın "Plzen Limiçe" komandaları olacaq. Həmin turnirin "A" qrupunda isə "Servette" ( İsveçrə), "Slaviya Praqa" (Çexiya), "Minsk"(Belarus) və "Lipovçi" (Sloveniya) komandaları yarışacaq.
Avropa Klub Çempionatının "Çelenc II" turnirində ölkəmizi təmsil edən Azərbaycan çempionu "Akkord" hokkeyçiləri öz qüvvələrini mayın 17-dən 20-dək Yunanıstanın paytaxtı Afina şəhərində İsveçin "Partil", Portuqaliyanın "Assosiaro Akademika de Espinoo" və Slovakiyanın "Raka" komandalarına qarşı sınayacaqlar. Digər qrupa "Mladost" (Xorvatiya), Grammarians"(Cəbəllütariq), "Soerbymagle"(Danimarka) və Yunanıstanın "Piqmi" komandaları daxildir.
