Yığmamız Portuqaliyanı pley-off matçında məğlub etdi
23 iyul 2012 15:43
Portuqaliyanın paytaxtı Lissabonda 21 yaşınadək qızlardan və oğlanlardan ibarət seçmə otüstü hokkey komandaları arasında Avropa çempionatı (III divizion) başa çatıb. Azerisport.az xəbər verir ki, oğlanların yarışında ilk turda Cəbəllütariq yığması ilə heç-heçədən (1:1) sonra komandamız Portuqaliya (2:5), Türkiyə (0:2) və Yunanıstan (2:3) təmsilçilərinə məğlub olub.
Həmyerlilərimiz yalnız dünən sonuncu turda Tural Əhmədov, Sənan İsmayılov və Əhməd Quliyevin vurduğu 3 qol sayəsində Cənubi Kipr idmançıları üzərində qələbə qazanmağı bacarıblar.
Qızların yarışında ilk turda Portuqaliya təmsilçilərinə 6:2 hesabı ilə qalib gələn, 1 gün sonra Türkiyə yığmasına 0:1 hesabı ilə məğlub olan hokkeyçilərimiz şənbə günü ilkin mərhələ çərçivəsində axırıncı oyununu İrlandiya komandasına qarşı keçirib. Baş məşqçi Ceyhun Mirzəyevin rəhbərlik etdiyi hokkeyçi qızlarımız matçın 18-ci dəqiqəsində Lalə Abbasovanın vurduğu qol sayəsində xeyli müddət hesabda irəlidə olublar. Lakin fasiləyə çıxmağa 1 dəqiqə qalmış rəqiblər bərabərlik qolunu vurublar. Görüşün qurtarmasına 9 dəqiqə qalmışadək 1:1 hesabı dəyişməz qalıb. Lakin İrlandiya təmsilçiləri 61-ci dəqiqədə qələbə topunu vuraraq 100 faizli nəticə ilə ilkin mərhələnin qalibi olublar. Onlardan 3 xal az toplayan Türkiyə hokkeyçiləri ikinci, komandamız 3 xalla üçüncü, Portuqaliya təmsilçiləri isə xalsız sonuncu - dördüncü yeri tutublar.
Komandaların yekun yerləri isə pley-off qarşılaşmalarından sonra müəyynləşib. Reqlamentə görə 3-cü - 4-cü yerləri tutan Azərbaycan və Portuqaliya təmsilçilərinin görüşündə həmyerlilərimiz sevinən tərəf olublar.
