Azərbaycan Belarusu darmadağın etdi (YENİLƏNİB)
27 aprel 2012 12:22
Bu gün Yaponiyanın Kakamiqahara şəhərində qadınlar arasında otüstü xokkey üzrə olimpiya lisenziyalı turnirin növbəti oyunları keçirilib. Azerisport.az xəbər verir ki, ikinci oyun günündə Azərbaycan yığması Belarus yığmasını 3:0 hesabı ilə məğlubiyyətə uğradıb.
Oyunun birinci hissəsindən sonra hesab 0:0 olub. İkinci hissədə Adil Paşayevin yetirmələri həlledici qollara imza atıblar. Xatirə Əliyeva dubl edib, sonuncudan əvvəlki dəqiqədə isə Çan Süleymanova fərqlənib.
Bu qələbə ilə Azərbaycan yığması 6 xalla yarışın liderinə çevrilib. Bu gün həm də Yaponiya - Malayziya və Avstriya - Çili görüşləri baş tutacaq.
Hazırda yarış cədvəlində komandaların mövqeyi ilə tanış olun:
Azərbaycan - 6 xal (2 oyun, top fərqi 7-0), Yaponiya - 3 xal (1 oyun, top fərqi 7-0), Belarus - 3 xal (2 oyun, top fərqi 3-4), Çili - 0 (1 oyun, top fərqi 1-3), Malayziya - 0 (1 oyun, top fərqi 0-4), Avstriya - 0 (1 oyun, top fərqi 0-7).
Xatırladaq ki, olimpiadaya vəsiqəni yarışın qalibi qazanacaq.