Veloidman üzrə hakimlərimiz Baki-2015 yolunda uğura imza atıblar
24 aprel 2014 12:22
Gələn il ölkəmizin ev sahibliyi edəcəyi ilk Avropa Oyunlarının proqramına daxil olan idman növləri arasında velosiped idman növləri də var (şose, MTB və BMX). Azerisport.az xəbər verir ki, bununla əlaqədar, Bakı-2015-in Təşkilat Komitəsi, eləcə də, Azərbaycan Velosiped İdmanı Federasiyasının (AVİF) birgə təşkilatçılığı ilə hakimlər üçün xüsusi kurslar keçirilib.
Xüsusi qeyd edilməli məqam burasıdır ki, ilk Avropa Oyunlarının proqramına daxil olan idman növləri arasında ilk kurslar məhz AVİF-in təşəbbüsü ilə baş tutub və bu tədbirdə federasiyanın 17 nümayəndəsi iştirak edib. Kurslara Bakı-2015-in Təşkilat Komitəsinin üzvü, Beynəlxalq Velosipedçilər İttifaqının (UCI) beynəlxalq dərəcəli hakimi Vladimiros Petsas rəhbərlik edib.
3 gün davam etmiş tədbirin yekunu olaraq, götürülən imtahanların nəticəsi ürəkaçan olub: federasiyamızın bütün üzvləri imtahanlardan uğurla keçiblər. Bu isə onlara Bakı-2015-in velosiped yarışlarında hakimlik etməyə imkan verir.
(AVİF mətbuat xidməti)