Milli yığma komandamız ilk dəfə olaraq Avropa çempionatında çıxış etdi
18 aprel 2014 16:44
Portuqaliyanın Palmela şəhərində səmti müəyyən etmə idman növü üzrə Avropa Çempionatına yekun vuruldu. Azerisport.az xəbər verir ki, Avropa İşçi Qrupuna daxil olduqdan sonra ilk dəfə olaraq Avropa Çempionatına dəvət alan ölkəmizi yarışda 5 idmançı təmsil edib. Azərbaycan ilə yanaşı Avropanın 30-a yaxın ölkəsindən təşrif buyurmuş beynəlxalq dərəcəli idmançılar da bu yarışa qatılmışdır.
Öz çətinliyi və gərgin mübarizəsi ilə xüsusi diqqət çəkən Avropa Çempionatında uzun, orta məsafələrdə qaçışlar və sprint yarışı keçirilmişdir. İdmançılarımızın ilk dəfə olaraq bu cür yüksək dərəcəli yarışda iştirak etməsinə baxmayaraq, uzun məsafə üzrə baş tutmuş qaçışda milli yığmanın üzvü Müvəssil Allahverdiyev bütün nəzarət məntəqələrində qeyd olunub finişə vaxtında çatmış, digər 3 idmançımız isə nəzarət vaxtından bir neçə dəqiqə kənara çıxaraq finala vəsiqə qazana bilməmişdir.
Sprint üzrə keçirilən yarış isə yığmamızın hər üzvü üçün uğurlu olmuşdur. Belə ki, idmançılarımız “Sprint Qualification” mərhələsindən müvvəfəqiyyətlə keçib finala vəsiqə qazanmışlar. Aprel ayının 13-ü isə Palmela şəhərində keçirilən Sprint final mərhələsində idmançılar 3.0 km məsafə üzrə 26 nəzarət məntəqəsində qeyd olunaraq finiş xəttinə vaxtından əvvəl çatmışlar. Milli yığmamızın üzvü Şəhriyar İsmayılov nəticədə 64 idmançı arasında 40-cı yeri tutmuşdur. Bu isə hələ gənc federasiyamız üçün böyük bir müvəfəqiyyətdir.
Avropa Çempionatı (EOC) çərçivəsində milli yığmamız İsveçin peşəkar idmançıları ilə bir neçə görüş keçirmiş, onlarla birgə treninqlərdə iştirak etmişdirlər. Bundan əlavə avropalılara səmti müəyyən etmə idman növünün son 2 il ərzində Azərbaycandakı inkişaf prosesi, həyata keçirilmiş layihələr, çəkilmiş xəritələr barədə geniş məlumat verilmiş, 30 may – 01 iyun 2014-cü il tarixlərində Xaçmaz rayonunda keçiriləcək səmti müəyyən etmə üzrə beynəlxalq çempionat – Azərbaycan xalqının Ümummilli lideri Heydər Əliyev adına Kubok Yarışında iştirak etmək üçün onları ölkəmizə dəvət etmişlər.