Jorj Gelzek: Hakimlər də insandır
Avropa Gimnastika İttifaqının prezidenti Jorj Gelzek Minskdə keçirilən bədii gimnastika üzrə Avropa çempionatının yekunlarıyla bağlı danışıb. Azerisport.az saytına açıqlamasında o, bunları söyləyib:
"Minskdə baş tutan Avropa Çempionatı yüksək səviyyədə keçirildi. Sevinirəm ki, bütün qonaqlar yarışın təşkilatçılığından razı qaldı. Əvvəllər Rusiya, Ukrayna və Belarus idmançıları gimnastikada rəqibsiz favorit sayılırdı. Amma indi rəqabət artıb. Bütün ölkələr medal qazanmağa çalışır. Gimnastikanın belə sevilməsi çox yaxşı haldır".
Gelzek eyni zamanda Azərbaycan komandasının çıxışı barədə fikrini bildirib. Gimnastlarımızıın çıxışı barədə xoş sözlər deyən AGİ-nın prezidenti hakimlərin nöqsanlara yol verdiyini etiraf edib: "Azərbaycan yığması çox gözəl kompozisiya nümayiş etdirdi. Ölkənizdə gimnastikaya xüsusi münasibətin olması idmanın bu növünün inkişafına yardım edir. Bu gün son çıxış zamanı (Marina Durundanın lentlə çıxışı) komandanız nəticəyə etiraz etdi. Mən təkrar baxarkən xalın düzgün verilməsinə israr etdim. Ona görə ədalət bərpa olundu. Hakimlər də insandır. Onlar da yanlışlığa yol verə bilər. Digər tərəfdən əksər növlərdə 3-6-cı yerləri tutan komandalar bərabər səviyyədə çıxış edirdi. Az səhv edənlər daha çox xal qazanırdı. Gələcəkdə müəyyən dəyişikliklər etməyi düşünürük. Yaxın gələcəkdə hakimləri Texniki Komitə deyil, vitse-prezidentlərin təyin etməsiylə bağlı qərarın müzakirə olunacağı gözlənilir".
