Əfran İsmayılov: Fiorentina ilə oyunda üstünlüyümüz azarkeşlərimizdir
"Qarabağ"ın yarımmüdafiəçisi Əfran İsmayılov Avropa Liqasının qrup mərhələsi çərçivəsində İtaliya "Fiorentina"sı ilə oyun öncəsi azerisport.az saytının suallarını cavablandırıb:
- "Fiorentina" ilə oyundan nə gözləyirsiniz?
- Matça ciddi hazırlaşmışıq. "Səbail"lə kubok matçından sonra bütün diqqətimiz bu oyuna yönəlib. Komandada hər şey yaxşıdır. Matçın startını gözləyirik. Uğurlu nəticəyə inanırıq.
- Təzyiq var?
- Təzyiq həmişə var. Əsas odur ki, məsuliyyəti, bizi nə gözlədiyini yaxşı dərk edirik. Yaxşı nəticə qazanmaq üçün meydanda var gücümüzü qoymalıyıq.
- Stadionda anşlaq yaşanacağı gözlənilir...
- Mən də bu barədə eşitmişəm. Elə ilk gündəcə 7-8 min biletin satılması böyük uğurdur. Bu, bizi sevindirir. Azarkeşlərimizdən böyük dəstək görürük. Bu baxımdan "Fiorentina" ilə oyunda da üstünlüyümüz olacaq. İtaliya klubu ilə görüşə son oyun sözü ilə baxırıq. Çox məsuliyyətli oyundur.
- "Qarabağ" bu oyunda nəyin sayəsində qələbə qazana bilər?
- Bunu hamıdan yaxşı Qurban Qurbanov bilir. O, artıq taktikanı bizə başa salıb və sadəcə, çıxıb onun dediklərini həyata keçirməyimiz qalır. Əminəm ki, elə də olacaq.
- Qrupda elə vəziyyət yaranıb ki, "Fiorentina" özü də mərhələ adlamaya bilər. Sizcə, onların Bakıya qrupdan çıxmağı təmin edərək gəlməsi sizin üçün daha rahat olmazdımı?
- İstənilən halda rəqibimiz zəif komanda deyil. Onlar hansı heyətlə oynasa, bizə çətin olacaq. Odur ki, biz buna fikir vermirik.
- Bir gözünüz PAOK - "Slovan" oyununda olacaq?
- Nə qədər deməsək də, elə olacaq. Orada baş verənlərlə maraqlanmağa məcbur olacağıq. Çünki taleyimiz həm də o oyundan asılıdır. Lakin istənilən halda bizi ilk növbədə öz oyunumuz düşündürür.
- Qarşılaşmanın baş hakimi - xorvatiyalı İvan Bebek çox qalmaqallı referidir. Bundan xəbəriniz varmı?
- Bəli, bu barədə oxumuşam. Türkiyədə onun haqqında çox sözlər deyiblər. Mətbuat da belə məqamları şişirtməyi xoşlayır. Biz ilk növbədə öz oyunumuzu sərgiləməyə çalışacağıq və hakimlik məsələsinə qarışmaycağıq.