Elxan Məmmədov: Qurban Qurbanov ilin ən yaxşı məşqçisi olmağa layiqdir
AFFA-nın baş katibi Elxan Məmmədov aralarında azerisport.az saytının əməkdaşının da olduğu bir qrup jurnalistin suallarını cavablandırıb:
- Danışılmış oyunlarla bağlı yaradılmış xüsusi komissiyanın işləri necə gedir?
- Ötən gün iclas oldu. Komissiya AFFA İntizam Komitəsi ilə birgə çalışır. Yekun barədə İcraiyyə Komitəsinə hesabat təqdim olunacaq. Ola bilsin ki, İK-nın növbəti iclası gələn il mart ayında olsun. Danışılmış oyunlar virusdur, bunu məhv etmək lazımdır. Belə şeylər təkcə bizdə baş vermir. Bütün dünyada buna rast gəlmək olar. Belə hallara qarşı mübarizədə biz də beynəlxalq təcrübədən yararlanmağa çalışırıq.
- Siyahıdakı adamların sayının artması mümkündür?
- Araşdırmalardan sonra bəlli olacaq.
- Baş məşqçi Robert Prosineçki bildirdi ki, millimizin bu qış yoxlama oyunu keçirməsi mümkün deyil...
- O, klubların maraqlarını nəzərə alır. Buna görə də hələ gözləyirik.
- Sizcə, bu ilin ən yaxşı məşqçisi kim olmalıdır?
- Sabit nəticələrin olması sevindirir. Məsələn, ötən mövsüm olduğu kimi, bu mövsüm də iki klubumuz Avropa Liqasının qrup mərhələsində çıxış edir. Futzalda, çimərlik futbolunda da uğurlarımız var. Ümid edirəm ki, bu gün "Qarabağ" da Avroliqanın pley-off mərhələsinə vəsiqə qazanacaq.
- "Qarabağ" qrupdan çıxsa, ilin məşqçisi Qurban Qurbanov, alınmasa, Robert Prosineçki ola bilər?
- Prosineçki hələ yola yenicə çıxıb. Qurbanov isə əksinə. "Qarabağ"ın ardıcıl üçüncü mövsüm qrup mərhələsində çıxış etməsi də böyük uğurdur. Qurban ilin ən yaxşı məşqçisi adına layiqdir.
- Bu mövsüm də ilin ən yaxşılarını mükafatlandıracaqsınız?
- Tsikl başa çatmadan seçim etmək çətin olacaq. Qoy tsikl bitsin, ondan sonra mövsümün ən yaxşılarını seçərik.