Paulo Souza: Qarabağı Avropada yaxşı tanıyırlar
Avropa Liqasının qrup mərhələsinin son turu çərçivəsində sabah "Qarabağ"ın qonağı olacaq "Fiorentina"nın baş məşqçisi Paulo Souza mətbuat konfransı keçirib. Azerisport.az xəbər verir ki, İtaliya təmsilçisinin portuqaliyalı məşqçisi öncə bunları söyləyib:
- İlk dəfədi açıq məşqi 15 dəqiqə deyil, tam şəkildə izləmək şansı verildiyini görürük. Bu, arxayınlıqdan qaynaqlanır, yoxsa başqa səbəb var?
- Biz bütün rəqiblərə hörmətlə yanaşırıq. "Qarabağ" da bu sıraya daxildi. Elitar məşqçiləri var, keyfiyyətli futbolçulara sahibdilər. Sadəcə, biz dəfələrlə bu imkanı yaratmışıq. Bizimlə jurnalistlər gəliblər. Yerli jurnalistlərə də işləməyə imkan veririk.
- PAOK-a uduzarkən azərbaycanlı futbolsevərlərin hansı hissləri keçirdiyini təsəvvürünüzə gətirdinizmi?
- Biz hər oyuna qələbə üçün çıxırıq. Həmin oyunda da əlimizdən gələn hər şeyi etdik. Təəssüf ki, məğlub olduq.
- "Qarabağ"la ilk oyunda rəqib komandanıza xeyli problem yaratdı. Sabahkı oyun haqda nə düşünürsünüz?
- "Qarabağ" qrupda ən güclü rəqiblərdən biridi. Bəli, evdə ilk 20 dəqiqədə çətinlik yaşadıq. Ancaq sonra sürəti artırdıq və istəyimizə çatdıq. Sabah da başlıca məqsədimiz topla və topsuz təşəbbüsü əldən verməməkdi. Düzdür, artıq pley-offdayıq, amma bu, arxayınlaşmağımıza əsas vermir.
- Start "11-liy"ini açıqlaya bilərsinizmi?
- Qoy sirr qalsın. Sabah öyrənəcəksiniz.
- Nəyə görə söyləməkdən boyun qaçırdığınızı da deməyəcəksiniz?
- İtalyan həmkarlarınızdan soruşun. Onlar bizim start heyətini həmişə dəqiqliyi ilə tapırlar. Futbolçulara heyəti açıqlamayınca, mediaya söyləyə bilmərəm.
- Qarabağ tarixi barədə məlumatınız varmı?
- Xeyr, xəbərsizəm. Ancaq bir şeyi deyə bilərəm ki, komandanız Avropada özünü artıq hamıya tanıdıb.