Qurban Qurbanov: Qərarı Rəşad Sadıqov özü verəcək
"Qarabağ"ın baş məşqçisi Qurban Qurbanov Avropa Liqasının qrup mərhələsi çərçivəsində İtaliya "Fiorentina"sına qarşı oyun öncəsi fikirlərini bölüşüb. Azerisport.az xəbər verir ki, o, bu gün baş tutan mətbuat konfransında bunları söyləyib:
"Qrupda son oyunumuzdur. Hər növbəti oyun ən vacib olur. Amma bu, sonuncu və daha vacib bir qarşılaşma olacaq. Yaxşı şansımız var. Bu şansdan yararlanmaq istəyirik. Amma rəqib "Fiorentina"dır. İtaliya klublarına qarşı oynamaq həmişə çətin olur. Yaxşı futbol göstərmək istəyirik".
Qurbanovun sözlərinə görə, komandası "Fiorentina"ya layiqli müqavimət göstərə bilər: "Əvvəllər olmadığı qədər diqqətli oynamalıyıq. Futbolçularda məsuliyyət hissi böyükdür. Bakıda böyük beşlik ölkələrinin təmsilçilərinə qarşı pis oynamırıq. Amma hər dəfə nəsə mane olur".
"Belə oyunlarda bizə ən çox mane olan rəqibdir. "Fiorentina" digər rəqiblərimizdən fərqlənir. Bu, elə komandadır ki, oyunun gedişində çox müxtəlif formalı hücumlar qurur. Rəqibin təcrübəli olması da bizə mane ola bilər. "Fiorentina" futbolçular topla oynamağı sevirlər. Amma bizim də bacardığımız nələrsə var. Rəqibdən çəkinmirik".
Qurbanov kapitan Rəşad Sadıqovun oynamaq ehtimalına da toxunub: "Onun meydana çıxmaq ehtimalı var. Böyük ehtimalla buna Rəşad özü qərar verəcək. PAOK-la oyunda meydana çıxmasını mən istəmişdim. İndi isə fərqli zədədir. Mən onu meydanda görmək istəyirəm, amma qərarı özü verməlidir".
