Aleksandr Çertoqanov: Azərbaycanlılarda futbola maraq çox azdır
Azərbaycan yığmasının sabiq yarımmüdafiəçisi Aleksandr Çertoqanovun azerisport.az saytına müsahibəsi
- "Sumqayıt"da futbolçu karyeranızı başa vurandan sonra sizdən xəbər yox idi. Azərbaycana yenidən qayıtmağınızda məqsəd nədir?
- Burada bəzi şəxsi işlərim vardı. Həm də çoxlu dostum var ki, onları görmək istəyiəm. Fikrimcə, buraya tez-tez gəlməli olacağam (gülür).
- Futboldan tam uzaqlaşmısınız?
- Bəli, hələ futboldan kənaram. Hər hansı planım da yoxdur. Mənə məşqçilik kursuna qatılmaq təklif olunub. Alınsa, ola bilsin ki, özüm üçün bunu edim.
- Siz gedəndən bəri Azərbaycan futbolunda nə dəyişib?
- Çox şey dəyişib. Artıq Premyer Liqada legioner sayı azalıb. Bu, yerli futbolçular üçün yaxşıdır. Çünki oynamaq şansı əldə edirlər. Amma rəqabət azalıb ki, bu da Azərbaycan futbolu üçün pis məqam sayıla bilər. "Qəbələ" artıq ikinci ildir Avropa Liqasının qrup mərhələsində oynayır, amma insanlar onun oyunlarına gedib dəstək olmurlar. Bu klubun ev oyunlarına hər baxanda təəssüf hissi keçirirəm. Çünki boş tribunaları görmək heç də xoş deyil. Ola bilər komanda uğursuz çıxış etsin, amma bu, tribunaları o şəkildə boş qoymağa əsas vermir. Əhalidə futbola maraq çox azdır.
- Siz bunu nə ilə izah edərdiniz?
- Dediyim kimi, Azərbaycan çempionatında rəqabət aşağıdır. İndi cəmi iki klub arasında rəqabət var, bunlar da "Qarabağ"la "Qəbələ"dir. Əvvəllər klublar arasında bu qədər uçurum yox idi. İstənilən komanda liderlə baş-başa mübarizə aparırdı. Azarkeş öncədən nəticəni bildiyi halda "Qarabağ"ın hansısa autsayderlə oyununa niyə getsin ki? Region komandalarının da sayı azalıb. Halbuki, əhali məhz regionlardakı oyunlara daha böyük maraq göstərirdi. Bölgələrdə futbola daha böyük sərmayə qoymaq lazımdır.
- "Qəbələ"nin ötən mövsümlə müqayisədə, bu mövsüm Avroliqada daha zəif çıxış etməsinin səbəbini nədə görürsünüz?
- Bu, Avroliqadır. "Qəbələ" üçün ardıcıl ikinci il qrup mərhələsində oynamaq da uğurdur. Əsas odur ki, klub bu turnirdə təmsil olunur. Gənc, iddialı klubdur, insanlar çalışırlar. Yaxın illərdə nəticə də gələcək. Bu komandanın işləri hazırda o qədər də pis deyil.
- Amma "Qarabağ" onlardan fərqli pley-offa çıxa bilər...
- Təbii ki, Ağdam klubu daha böyük təcrübəyə malikdir. Ardıcıl üçüncü mövsümdür qrup mərhələsində oynayırlar. Onlara bir qədər asandır.
- "Fiorentina" ilə oyuna gedəcəksiniz?
- Televizordan baxacağam (gülür). Onu deyim ki, ağdamlıların şansı azdır. PAOK-un öz meydanında "Slovan"ı məğlub edəcəyi şübhə doğurmadığından, "Qarabağ" da "Fiorentina"ya qalib gəlməyə çalışmalıdır. Ağdam klubunun oyununda cüzi də olsa, geriləmə var. Heyətdə də itkilər mövcuddur. Ümid edək ki, tribunaların dəstəyi, oyunçuların meydanda canını qoyması ayəsində uğur qazanmaq mümkün olacaq.
- Yığmamızın DÇ-2018-in seçmə mərhələsi çərçivəsindəki çıxışı sizi təəccübləndirmir?
- Nəticələr təbii ki, təəccübləndirir. Amma sərgilənən oyunda bunu hiss etməmişəm. Yığmada uşaqlar həmişə meydanda can qoyublar. Bu tempdə də davam etmək lazımdır. Oyun baxımından da artırmağa ehtiyac var. Bilirəm ki, yığmada oynamaq çox çətin və məsuliyyətlidir.
