Cüneyt Biçər: Azərbaycan futbolu səviyyəcə geriləyib
"Bakı" və "Xəzər Lənkəran"ın sabiq baş məşqçisi, hazırda Türkiyənin "Altay" klubu çalışdıran Cüneyt Biçər Azərbaycan futbolu barədə fikirlərini bölüşüb. Türkiyəli mütəxəssis azerisport.az saytına açıqlamasında bunları söyləyib:
"Zaman tapdıqca Azərbaycan futbolu ilə maraqlanıram. Fikrimcə, mən Azərbaycan liqasında çalışdığım dövrlə müqayisədə çox şey dəyişib. Məsələn, ən azından "Bakı" və "Xəzər Lənkəran" kimi ciddi klublar hazırda Premyer Liqada deyil. Əvvəlki rəqabət yoxdur. Bu üzdən də futbolunuzun səviyyəsinin aşağı düşdüyünü düşünürəm".
"Qarabağ", son dövrlərdə isə "Qəbələ" yaxşı mənada dəyişib, inkişaf edib. Xüsusilə Ağdam klubunun rəhbərliyi bu komandaya sabitlik gətirib. Onların dostum Qurban Qurbanova göstərdiyi inam və etimad da öz bəhrəsini verir. "Qarabağ"a bundan da böyük uğurlar arzulayıram. Ağdamlılar bu mövsüm də çempion ola bilər. Amma "Qəbələ" də onlarla rəqabət aparacaq gücdədirlər".
Biçər Ağdam klubunun Avropa Liqasının qrup mərhələsindəki son oyununda İtaliya "Fiorentina"sına qalib gəlmək şansları barədə də danışıb: "Qarabağ"a "Fiorentina" üzərində qələbə qazanmağı ürəkdən arzulayıram. Əminəm ki, Qurbanov və komandası pley-offa yüksələcək".
O, millimizin DÇ-2018-in seçmə mərhələsindəki çıxışından da söz açıb: "Komandanızın çıxışını uğurlu saymaq olar. Yığmanız yüksək səviyyəli nəticələr göstərir. Ümid edirəm ki, uğurun davamı gələcək və milliniz qrupdan çıxacaq. "Trabzonspor"da çox forma şansı qazanmayan Ramil Şeydayev barədə yalnız onu deyə bilərəm ki, hər bir futbolçu üçün ən yaxşı klub onun mütəmadi oynadığı komandadır. "Bursapor"lu Dəniz Yılmaza gəlincə, onun yığmanızda oyununu gördüm. Şübhəsiz ki, ona inandıqlarını göstərdilər. Ümid edirəm ki, o, etimadı doğruldacaq və Azərbaycan yığmasına faydası toxunacaq".