Roman Qriqorçuk: Qəbələnin pis oynadığını düşünmürəm
"Qəbələ"nin baş məşqçisi Roman Qriqorçukun azerisport.az saytına müsahibəsi
- Qarşıda Avroliqa çərçivəsində Almaniya "Maynts"ı ilə oyun var. Son oyunda nəyə ümid edirsiniz?
- Vəziyyətdən asılı olmayaraq, bizim üçün inkişaf etmək vacibdir. Beş oyun keçirmişik. Üçüncü turdan etibarən daha yaxşı oynayırıq. Bu yüksəlişin davamını görmək istəyirəm. Hədəfimiz belə rəqiblərlə bərabər səviyyədə oynamağa alışmaqdır.
- Azərbaycanlı mütəxəssislərdən biri "Qəbələ"nin böyük hesabla uduzacağını proqnozlaşdırıb. Bu, mümkündür?
- Bu fikri müzakirə edə bilmərəm. Hər kəsin öz fikri var. Biz yaxşı futbol göstərmək istəyirik. Bunu bacarsaq, nəticə də qazana bilərik.
- Baqali Dabo oynayacaq?
- Dəqiq söz söyləmək çətindir. Amma böyük ehtimalla oynayacaq.
- Meydana döyüşkən heyət buraxacaqsınız, ya buna ehtiyac duymursunuz?
- Heyət Belçika "Anderlext"i ilə son oyundakına oxşar olacaq.
- Sanki son uğursuzluqlar komandanızda özünəinamın itməsinə səbəb olub...
- Bunu deyə bilmərəm. Çünki pis oynadığımızı düşünmürəm. Düzdür, Azərbaycan Kubokunun 1/8 finalında "Zaqatala" ilə görüşdə komanda özünü yaxşı tərəfdən göstərə bilmədi. Amma bunun da öz səbəbləri var.
- Sizinlə eyni gündə "Qarabağ" Bakıda İtaliya "Fiorentina"sı ilə qarşılaşacaq və pley-offa çıxmaq üçün mübarizə aparacaq. Onların şansları barədə nə deyə bilərsiniz?
- Bu, təkcə "Qarabağ" yox, bütövlükdə Azərbaycan futbolu üçün tarixi bir şansdır. Ağdam klubuna bu şansdan yararlanmağı, heç bir Azərbaycan klubunun nail olmadığı bu uğuru qazanmalarını arzulayıram.