Vüqar Nadirov: Qarabağ tarix yaza bilər, hər şey öz əlimizdədir
"Qarabağ"ın hücumçusu Vüqar Nadirovun azerisport.az saytına müsahibəsi
- "Səbail"lə kubok oyununda da sizə şans verilmədi. Niyə oynamadınız?
- Təxminən 3 həftədir zədəliyəm. Məşqləri yenicə bərpa etmişəm.
- Harada zədə aldınız?
- Əvəzedicilərin çempionatında. 3-4 günə komanda ilə məşqlərə başlayacağam. Hazırda həkimlərin qərarını gözləyirəm.
- Bu qədər az oynadığınızı nəzərə alsaq, qışda klubunuzu dəyişməyi düşünmürsünüz?
- Xeyr, "Qarabağ"dan getmək istəmirəm. Məşqləri bərpa edib, şansımı gözləyəcəyəm. Əminəm ki, hər şey yaxşı olacaq.
- Qurban Qurbanovla bu barədə söhbətiniz olub?
- O, heç kimə şans söz vermir. Kim yaxşı formadadırsa, o da oynayır. Mən də oynamaq üçün tam hazır olmalıyam.
- "Qarabağ"ın "Fiorentina" ilə Avroliqa oyunundan nə gözləyirsiniz?
- Komandamız oyuna ciddi hazırlaşır. Bütün oyunçular bu matçın önəmini anlayır. Azərbaycan futbolunda yeni tarix yazmaq istəyirik. Hər şey öz əlimizdədir.
- Vaxtilə "Qarabağ"da və millidə sabit oynayırdınız. İndi bu komandaların oyununu kənardan izləmək ağır deyil?
- Haqlısınız, bu komandaların oyununu kənardan izləmək mənim üçün çox ağırdır. Mən də oynamaq, qollar vurmaq istəyirəm. Meydana çıxmaq üçün öncə formamı bərpa etməliyəm.
- O dövrlə müqayisə sizə münasibətdə nəsə dəyişib?
- "Qarabağ"da elə şey yoxdur ki, kim oynamırsa, ona pis baxsınlar. Komandada hamı bir-birini yaxşı tanıyır. Az və ya çox oynamağımdan asılı olmayaraq, daim komandanın yanındayam. Azarkeşlərə gəlincə, onların da dəstəyini almağa çalışıram. Yəqin ki, onlar da məni sevirlər.