Bədavi Hüseynov: Hədəfimiz AZAL-a da qalib gəlməkdir
"Qarabağ"ın müdafiəçisi Bədavi Hüseynov Topaz Premyer Liqasının 9-cu turu çərçivəsində "Neftçi" üzərində qazandıqları qələbədən danışıb. Azerisport.az saytına açıqlamasında o, 2:0 hesablı qələbə ilə bağlı bunları söyləyib:
"Son oyunumuz çətin alındı. Ümumiyyətlə, "Neftçi" ilə qarşılaşmalarımız həmişə ağır olur. Çünki bakılılar bizə qarşı xüsusi hazırlaşırlar. Bu dəfə də elə oldu. Buna baxmayaraq, müdafiədə inamlı oynadıq, lazım olan qolları da vuraraq qalib gəldik. Həmin matçın sonunda baş verənlərə gəlincə, mənə elə gəldi ki, birinci azarkeş futbolçuya zərbə endirdi. Amma sonradan təkrara baxanda Katalin Tiranın futbolçunu vurduğunu gördüm. Əlbəttə, heç bir futbolçu belə bir hərəkətə yol verməməlidir. Maksimlə Riçardın hakimin qırmızı vərəqə göstərdiyi epizoda müdaxiləsinə gəlincə, onlar futbolçunun özünü qorumasını başa salmağa çalışırdılar. Amma belə epizodlara görə futbolçuya qırmızı vərəqə verilir. Növbəti oyuna gəlincə, AZAL-la qarşılaşcağıq. Əsas hədəfimiz qalib gəlməkdir".