Renan Alveş: Azərbaycan çempionatında oynamaq asan deyil
"Kəpəz"in müdafiəçisi Renan Alveşin azerisport.az saytına müsahibəsi
- Premyer Liqanın son turunda "İnter"lə ev oyunundakı qolsuz heç-heçə sizi qane etdi?
- Yaxşı oynadıq. Mövsümdəki ən yaxşı oyunlarımızdan biri idi. Amma qələbə qazana bilmədik. Qalib gəlsəydik, daha da yerinə düşərdi. Lakin heç-heçə də pis nəticə deyil.
- Liderlərə yenə yaxınlaşa bilmədiniz. Üst sıralara çıxmağınız nə dərəcədə realdır?
- Bizim öz hədəflərimiz var. İndi turnir cədvəli barədə düşünmək vacib deyil. Əsas hər oyunda qələbə qazanmaqdır.
- Hədəfinizin nədən ibarət olduğunu demədiniz...
- Ən yaxşı yerlərdən birini tutub, Avropa Liqasına vəsiqə qazanmaq istəyirik.
- Premyer Liqada oynamaq asandır?
- Asan olduğunu deməzdim. Maraqlı çempionatdır. Burada oynamaq çətindir.
- Demək olar ki, bütün rəqiblərə qarşı oynamısınız. Hansı forvarda qarşı oynamaq sizin üçün çətin olub?
- Güclü hücumçular var. Amma çempionatınızda qol vurmaq elə də asan deyil. Mən hər bir rəqibə qarşı yaxşı oynamağa çalışıram. Ona görə də hansısa futbolçunu digərlərindən fərqləndirməyim doğru olmaz.
- Portuqaliya çempionatında cərimə zərbələrindən qollar vuran Renana Azərbaycanda bu cür fərqlənməyə nə mane olur?
- Bəli, təəssüf ki, hələ bu istəyimə çata bilməmişəm. Mən də fanatlarımızı sevindirməyi çox istəyirəm. Əminəm ki, qol vura biləcəyəm.
- Bakıda yaşayıb Gəncədə oynamaq sizin üçün rahatdır?
- Bu, elə də asan deyil. Çünki Gəncədə bazamız yoxdur. Buna görə də orada qala bilmirik. Artıq hər oyundan bir gün öncə oraya getməyə alışmışıq. Buna baxmayaraq, hər oyunda müsbət nəticə qazanmağa çalışırıq.