Jayro: Sizcə, öz qapımıza qol vurmaq mənim xoşuma gəlir?
"Neftçi"nin müdafiəçisi Jayro Topaz Premyer Liqasının 9-cu turu çərçivəsində "Qarabağ"a qarşı keçirdikləri oyundan (0:2) sonra fikirlərini bölüşüb. Azerisport.az xəbə verir ki, braziliyalı futbolçu öncə bunları söyləyib:
"Rəqibimizin necə komanda olduğunu hamımız yaxşı bilirdik. "Qarabağ" bu gün bütün komponentlərdə bizdən yaxşı çıxış etdi. Biz layiqli mübarizə aparmağa, ən azı bir xal qazanmağa çalışdıq. Amma alınmadı. Azarkeşlərdən bu nəticəyə görə üzr istəyirəm Onlar bizdən daha yaxşısını tələb etməkdə haqlıdırlar".
"Şəxsən mən tam gücümü meydanda qoyuram. Oyunun antiqəhrəmanı oldum? Ola bilsin ki, siz elə düşünürsüz. Fikrinizə hörmətlə yanaşıram. Futbolda belə hallar olur".
"Neftçi"də üçüncü avtoqoluna imza atan Jayro onlardan ikisini artıq "Qarabağ"la oyunlarda öz qapısından keçirib. Bununla bağlı suala braziliyalı futbolçu sualla cavab verdi: "Nə edə bilərəm? Bu suala necə cavab verim? Sizcə, öz qapımıza qol vurmağım mənim xoşuma gəlir?"
"Hər məğlubiyyətdən sonra növbəti oyuna daha böyük istəklə, daha böyük məsuliyyətlə çıxırıq. Hər oyuna ciddi hazırlaşırıq ki, nəticə qazanaq. Klub rəhbərliyində, məşqçilər korpusunda ciddi dəyişikliklər olub. Bütün bunlar hamısı vəziyyətin düzəlməsi üçün edilir. "Qarabağ"la oyunu da müsbət nəticə ilə başa vurmağı hər bir futbolçumuz, məşqçimiz çox istəyirdi. Amma hərdən elə şeylər olur ki, buna izah tapmaq olmur. Necə ki, bu gün də növbəti uğursuzluqla üz-üzə qaldıq".