Rəhman Hacıyev: Katalin Tira ilə bağlı epizod xoşagəlməz hadisədir
"Neftçi"nin yarımmüdafiəçisi Rəhman Hacıyev Topaz Premyer Liqasının 9-cu turu çərçivəsində "Qarabağ"a qarşı keçirdikləri oyundan (0:2) sonra aralarında azerisport.az saytının əməkdaşının da olduğu bir qrup jurnalistin suallarını cavablandırıb:
- Matçla bağlı nə deyə bilərsiniz?
- Hamımız bir nəfər kimi vuruşduq. Düzdür, uduzduq, amma yaxşı oynadıq, mübarizə apardıq. Artıq neçə oyundur uduzduğumuz üçün atmosfer doğrudan da çox pisdir. Biz özümüz bu vəziyyətə düşmüşük. Özümüz də çıxmalıyıq.
- Məğlubiyyətə nə səbəb oldu? Yoxsa yenə gücünüz çatmadı?
- Taktiki tapşırıqları yerinə yetirməyi bacarmadıq. İlk qolu uzaqdan vurulan zərbə nəticəsində buraxdıq. İkincisi isə avtoqol oldu. Yəni, rəqibə xüsusi kombinasiya qurub qol vurmağa imkan vermədik.
- Sanki, futbolçular meydanda öz mövqelərini itirirdilər...
- Hesabda geridə olduğumuza görə, irəli getməyə, qol vurmağa çalışırdıq. Bu da normaldır. İkinci qolu da məhz bunun nəticəsində buraxdıq. Halbuki, biz hesabı bərabərləşdirmək üçün irəli atılmışdıq. "Qarabağ" isə bizi əks-hücumda yaxalayıb ikinci qolu vurdu.
- Matçın sonundakı xoşagəlməz olayla bağlı nə deyə bilərsiniz? Orada nə baş verdi?
- Doğrudan da xoşagəlməz hadisədir. Mən özüm də nə baş verdiyini anlamadım. Meydana daxil olan azarkeşin mənə doğru gəldiyini gördüm. Sonra Katalin Tira da ona doğru qaçdı. Belə bir hadisənin baş verməsini istəməzdim. Azarkeş mənə əl qaldırsaydı, mən də ona, hər şey çox pis olardı. Tira ilə söhbətimiz oldu. O, azarkeşin əlində nəsə olmasından ehtiyatlanıb. Buna görə ona hücum edib.
- Amma Tira azarkeşin əlində heç nə olmadığını, polislər tərəfindən saxlanıldığını görəndən sonra da ona hücum çəkməyə davam edirdi...
- Bunu artıq görmədim. Tiranın özündən soruşmaq lazımdır. Bütövlükdə, xoşagəlməz hadisədir.
- Azarkeşlərin hər oyunda sizi fitə basması mənfi təsir göstərir?
- Əlbəttə, bunun bizə çox təsiri olur. Çünki "Neftçi"nin adını biz daşıyırıq. Baş verənlər bizə təsirsiz ötüşə bilməz.
