Dino Ndlovu: Qarabağ üçün əlimdən gələni edirəm, sadəcə, qol vura bilmirəm
"Qarabağ"ın hücumçusu Dino Ndlovu Topaz Premyer Liqasının 9-cu turu çərçivəsində "Neftçi"yə qarşı keçirdikləri oyundan (2:0) aralarında azerisport.az saytının əməkdaşının da olduğu bir qrup jurnalistin suallarını cavablandırıb:
- Oyun necə keçdi?
- Səfərdə keçirdiyimiz oyunlar arasında ən çətini oldu. Buna baxmayaraq, üç xal qazanmağı bacardıq. Bu, çox sevindiricidir.
- Yəqin ki, sizi həm də çempionluq yolundakı əsas rəqibiniz "Qəbələ"nin "Sumqayıt"la oyunda xal itirməsi də sevindirdi...
- Ciddisiniz? Bunu bilmirdim. Amma istənilən halda digər komandaların oyunları bizim üçün maraqsızdır. Qurban Qurbanov bizi öz oyunlarımıza hazırlayır. Buna görə də bizim üçün öz oyunlarımız maraqlıdır.
- Son dövrlər start heyətdə tez-tez meydana çıxırsınız. Bu, artıq komandaya tam uyğunlaşdığınızdan xəbər verir?
- Mənə şans veriləndə ondan maksimum yararlanmağa çalışıram. "Qarabağ" üçün əlimdən gələni edirəm. Etiraf edim ki, mənim üçün start heyətdə və ya sonradan meydana çıxmağın ciddi fərqi yoxdur. Əsas oyuna yüz faiz hazır olmaqdır.
- Öz oyununuzdan razısınız?
- Məni məyus edən yalnız qol vura bilməməyimdir. Daha doğrusu istədiyim qədər qol vura bilmirəm. Amma statistikaya nəzər salsaq, görərik ki, qaçıram, qol ötürmələrim var, komandama kömək edirəm. Komandaya uyğunlaşdığımı da deyə bilərəm. Sadəcə, istədiyim kimi qollar vura bilmirəm. Zamanla bunun da qaydasına düşəcəyini düşünürəm.
- Meydanda çalışdığınız hiss olunur. Bəs qol vurmaq üçün daha nə lazımdır?
- Əsas komandamızın nəticə qazanmasıdır. Matçdan sonra 3 xal qazanırıqsa, deməli, mən də komandanın bir üzvü kimi istəyimə çatmış oluram. Amma komandamız uduzanda, mən də qol vura bilməyəndə çox məyus oluram. Bu gün isə qol vura bilmədiyim üçün o qədər də üzgün deyiləm.
