Roman Qriqorçuk: Bunu uğursuzluq hesab etmirəm
"Qəbələ"nin baş məşqçisi Roman Qriqorçuk Topaz Premyer Liqasının 9-cu turu çərçivəsində "Sumqayıt"a qarşı oyun öncəsi azerisport.az saytının suallarını cavablandırıb:
- "Sumqayıt"la son oyununuz yadınızdadır? Həmin matçdan sonra hakimlik ciddi müzakirə mövzusuna çevrilmişdi...
- Mən bütün oyunlarımızı xatırlayıram. "Sumqayıt"la həmin oyundakı hakimliyi yenidən müzakirə etmək istəmirəm. Çətin olacağını bilirik. Bütün oyunlarımız çətindir. Asan matçolmur.
- "Sumqayıt"la oyunlarınız daha çətin keçir. Bu nədən irəli gəlir?
- Bununla razı deyiləm. Axı hansı komanda ilə oyunumuz asan keçir ki? Biz belə çətinliklə yalnız sumqayıtlılarla oyunda rastlaşmırıq. Qarşıdakı oyunun çətinliyi ondan ibarətdir ki, süni örtüklü meydanda oynayacağıq. Bizim üçün də bu, həmişə çətinlik yaradıb. Normal nəticə qazanmaq istəyirik. Normal nəticə də qələbədir.
- Heyətdəki itkilərin oyuna təsiri nə dərəcədə böyük olacaq?
- İtkilərimiz var və hiss olunacaq dərəcədədir. Biz istədiyimiz kimi komplektləşməmişdik. Bu üzdən də indi üzləşdiyimiz hər bir itki ciddi problem yaradır. Amma şikayətlənmək fikrim yoxdur. Böyük nəticələrə imza atmaq istəyən komanda belə itkilərə fikir verməməlidir. Meydana çıxacaq hər bir futbolçumuzun özünü doğruldacağına inanıram. Bu, onlar üçün həm də bir şansdır. Qoy bundan istifadə etsinlər.
- Avroliqanın qru mərhələsi çərçivəsində ardıcıl üç məğlubiyyətdən sonra komandanız özünü necə hiss edir?
- Hər şey qaydasındadır. Mən bunu uğursuzluq hesab etmirəm. İndi xal da toplasaydıq, bu, əsl möcüzə olardı. Hələ ki, bunu bacarmamışıq. Buna baxmayaraq, üzgün olmağa dəyməz. Futbolçular özlərini yaxşı hiss edirlər.
- Cavid Hüseynov artıq komanda ilə məşqlərə başlayıb. Necədir?
- Buna çox sevinirəm. Onun vəziyyətini yaxşı qiymətləndirirəm İnanıram ki, tez bir zamanda sıraya dönəcək.
- Nə vaxt dönəcəyi dəqiq deyil?
- Futbolçunun emosional vəziyyəti yaxşıdır. Fikrimcə, tezliklə onu meydanda görəcəksiniz.
- Tezliklə - nə vaxt?
- Nə vaxt olacağını deməyəcəyəm. Mən də onun tez bir zamanda sırada olmasını arzulayıram.