Slavik Alxasov: Gəncədən 3 xalla qayıtmaq istəyirik
"İnter"in müdafiəçisi Slavik Alxasov Topaz Premyer Liqasının 9-cu turu çərçivəsində "Kəpəz"ə qarşı keçirəcəkləri oyun öncəsi azerisport.az saytına müsahibə verib:
- Birinci dövrədə komandanız "Kəpəz"ə məğlubiyyətdən son anda xilas olmuşdu (2:2). Yəqin ki, bu dəfəki qarşılaşmaya daha ciddi yanaşacaqsınız. Çünki oyun səfərdə baş tutacaq...
- Gəncəlilərlə birinci dövrədəki oyun doğrudan da çətin alındı. Amma sonda heç-heçəyə nail ola bildik. "Kəpəz" doğma meydanda güclü oynayır. Buna görə bizə yenə çətin olacaq. Bu üzdən də oyuna yaxşı hazırlaşmışıq.
- Rəqibin heyətində Dario Federikonun yoxluğu sizin üçün üstünlük sayıla bilər?
- Eşitmişəm ki, Dario zədə alıb və bizə qarşı oynamayacaq. O, döyüşkən futbolçudur və "Kəpəz"ə çox fayda verir. Amma mənə elə gəlir ki, rəqib Darionun yoxluğunda da bizə qarşı sonadək mübarizə aparacaq və onun meydanda olmaması oyuna təsir etməyəcək.
- Heç-heçə yenə sizi qane edəcək?
- Biz qələbə qazanmaq istəyirik. Düzdür, çətin olacaq. Amma üç xal qazanmaq üçün bütün gücümüzü qoymalıyıq.
- "İnter"in bu mövsüm sürpriz edib, çempionluğa imza atması mümkündür?
- Niyə də yox? Hər matçda qələbə üçün oynayırıq. Düzdür, çempion olmaq çətindir. Çünki "Qarabağ", "Qəbələ" kimi güclü komandalar var ki, hazırda Azərbaycanı Avropa Liqasında təmsil edirlər. Onlara uğurlar arzulayıram. İstənilən halda biz də sonadək mübarizə aparacağıq.
- "Qarabağ" Gəncəyə təyyarə ilə yollanmışdı. "İnter" isə fərqli marşrut seçdi...
- "Qarabağ" sıx qrafiklə oynayır. Onlar buna görə Gəncəyə təyyarə ilə getmişdilər. Bizim üçün isə 4-5 saat avtobusla yol getmək problem deyil.
- Vaxtilə "Neftçi", "Xəzər Lənkəran", "Sumqayıt"da çıxış etmisiniz. Amma deyəsən "İnter"də özünüzü daha yaxşı hiss edirsiniz...
- "Neftçi"də ancaq əvəzedici komandada oynadım. "Sumqayıt" mənə doğma klubdur, orada oynamaq asanidi. "İnter"də oynamaq da asandır. Çünki Ağabala Ramazanovla "Sumqayıt"da da bir cinahda çıxış edirdik, burada da. Oyunumuz da alınır.
- Robert Prosineçkinin sizi milliyə dəvət etməsini gözləyirsiniz?
- Əlbəttə. Amma çağırmasa da, bunu normal qəbul edirəm. Yığmada oynamağı hər kəs istəyir. Milliyə dəvət almaq üçün çox çalışmaq lazımdır. Ümid edirəm ki, Prosineçkinin mənə dəvət göndərdiyi gün də gələcək. Buna çox sevinərəm.
