Rikardinyo: Qəbələ uğur qazanmaq istəyirsə...
"Qəbələ"nin müdafiəçisi Rikardinyo Avropa Liqasının qrup mərhələsi çərçivəsində Fransa "Sent-Etyen"inə qarşı keçirəcəkləri oyun öncəsi azerisport.az saytının suallarını cavablandırıb:
- Fransızlarla oyuna hazırsınız?
- Əlbəttə. Komandamızda əla atmosfer var. Bizim üçün vacib oyundur.
- Bu görüş öncəsi sizi ən çox narahat edən hansısa problem varmı?
- "Sent-Etyen"in güclü rəqib olduğunu bilirik. Heyətində keyfiyyətli futbolçular var. Uğur qazanmaq istəyiriksə, onlara qarşı diqqətli oynamalıyıq.
- Oyunu buraxacaq Baqali Dabonu kim əvəz edə bilər?
- Dabo əvvəlki oyunlarda bizə çox kömək edib. Hər oyunda sonadək mübarizə aparırdı. Onun yoxluğu bizim üçün ciddi itkidir. Əminəm ki, baş məşqçinin onun yerində oynadacağı futbolçu da əlindən gələni edəcək.
- Dabo "İnter"lə səfər oyununda zədələndi. Komanda yoldaşlarınızdan da bu klubun ev oyunlarını keçirdiyi arenanın süni örtüklü qazonundan şikayətlənənlər oldu. Siz bu barədə nə düşünürsüz?
- Hər kəsin öz fikri var. Mənim üçün yüksək keyfiyyətli süni örtükdə oynamaq problem deyil. Amma "İnter"in qazonu yeniləməsi daha yaxşı olardı. Onların həmin qazondan neçə ildi istifafə etdiyini bilmirəm.
- "Sent-Etyen"lə oyunlar sizin qrupdan çıxmaq üçün son şansınız kimi dəyərləndirilir...
- Biz də fransızlarla oyunda uğur qazanmaq, şanslarımızı artırmaq istəyirik. Amma mənə elə gəlir ki, bu oyunlar bizim üçün son şans deyil.
- Amma Fransada mümkün məğlubiyyət komandanıza mənfi təsir göstərə bilər. Çünki növbəti oyununuzu da bu rəqibə qarşı keçirməli olacaqsız...
- Bizə istənilən halda çətin olacaq. Ona görə də qalan hər bir oyuna qələbə üçün çıxmağa məcburuq. Bu gün də "Sent-Etyen"dən xal almağımız vacibdir.
- Premyer Liqada çox az oynayırsınız. Bundan narahat deyilsiz?
- Hər şey qaydasındadır. Hərdən oynayıram, hərdən yox. Əlbəttə, mən də bütün oyunlarda meydanda olmaq istəyərdim. Amma bu gün üçün vəziyyət belədir.
- Siz də Cavid Hüseynovun dönüşünün komandanıza kömək edəcəyini düşünürsünüz?
- Onun sıraya dönməsinə sevindim. Məşq zalında görüşdük. Vaxtilə komandamıza necə kömək etdiyini bilirik. O, indi də həmin hissləri yaşamaq, komandaya kömək etmək istəyir. Fikrimcə, Cavidin yenə bizə çox faydası dəyəcək.