Ronaldinyo: Braziliya və Azərbaycan yığmalarının oyununu təşkil edə bilərəm
"Qəbələ" klubunun dəvəti ilə ölkəmizdə səfərdə olan Ronaldinyonun iştirakı ilə Bakı Olimpiya Stadionunda mətbuat konfransı keçirilib. Azerisport.az xəbər verir ki, tədbirdə çıxış edən braziliyalı ulduz öncə bunları söyləyib:
- Hamınızı salamlayıram. Şadam ki, tədbirdə bu qədər jurnalist görürəm. Azərbaycan haqda çox müsbət fikirlər eşitmişəm. Təxminən ayyarım əvvəl "Qəbələ"dən mənimlə əlaqə saxladılar və belə bir akademiyanın yaradılması ilə bağlı müzakirələrə başladıq.
Mənim əsas hədəfim uşaqların öz işlərinə daha motivasiyalı, daha ciddi yanaşmasıdır. Fikrimcə, yeni akademiyanın mənim adımı daşıması onlar üçün bir stimul olar. Akademiyada təhsil alacaq uşaqlar gələcəkdə yaxşı futbolçu olacaqlarsa, buna ancaq sevinə bilərəm.
- Siz sonradan belə futbolçu oldunuz, ya belə anadan olmusunuz?
- Tanrı mənə hədiyyə verib. Amma məni bu səviyyəyə çatdıran məşqlər olub. Mən hamıdan çox məşq edirdim.
- Gələcəkdə Azərbaycan və Braziliya yığmaları arasında yoxlama oyunu təşkil edə bilərsiniz?
- Eşitmişəm ki, komandanız yeni seçmə mərhələyə çox uğurlu başlayıb. Üç oyuna 7 xal toplayıblar. Gördüyünüz kimi, gəlmişəm və futbolunuzla daha yaxından tanış olmağa çalışıram. Yığma komandalarımız arasında belə bir oyun təşkil etməyə hazıram. Əsas odur ki, bunu hər iki komanda istəsin.
- Azərbaycan klublarından hansısa sizi heyətində görmək istəsə, razılaşarsınız?
- Hələ karyeramla bağlı yekun qərarımı verməmişəm. İlin sonuna kimi bir qərar verəcəyəm. Ola bilər ki, karyeramı davam etdirim, amma vida matçı keçirməyim də mümkündür.
- Dünyanın ən yaxşı futbolçusu kimdir?
- Messi.
- Azərbaycanlı futbolçulara nə məsləhət verərdiniz?
- Futbol oynamağa nə qədər tez başlasalar, bir o qədər yaxşıdır. Ciddi məşq etmək lazımdır. Məşqə hamıdan tez gəlib, hamıdan gec getmək lazımdır.
- Pele və Maradona səviyyəsinə çatmağınıza nə mane oldu?
- Mən onların səviyyəsindəyəm (gülür).
- "Qəbələ"də oynamaq istəyərdiniz?
- Niyə də yox?