Oqtay Dərəlioğlu: Azərbaycanda Dəniz Yılmazdan da yaxşı oyunçular tapmaq olar
Türkiyə yığmasının və "Xəzər Lənkəran"ın sabiq hücumçusu Oqtay Dərəlioğlunun azerisport.az saytına müsahibəsi
- Azərbaycan yığmasının DÇ-2018-in seçmə mərhələsindəki çıxışı barədə nə deyə bilərsiniz?
- Ümid edirəm ki, Norveç üzərində qələbə (1:0) və Çexiya ilə səfərdəki heç-heçə (0:0) Azərbaycan futboluna müsbət təsir edəcək. Azərbaycan futbolunun inkişaf etməsini istəyirəm. Amma Türkiyədəki kimi süni formada yox. Robert Prosineçki mənim dostumdur, ona görə də çox sevinirəm. Onunla "Kayserispor"da çalışdığı dövrdən tanışıq.
- Prosineçkinin komandası bu qrupdan çıxa bilər?
- Tsiklə yaxşı başlamısız. Azərbaycan yığması Almaniyaya da müqavimət göstərməlidir. Bax bu, əsl olay olar. Amma bu uğurların davamlı olması lazımdır. Azərbaycanın Bosniya və Herseqovinadan nəyi pisdir? Ölkə olaraq onlar zəifdir. Azərbaycan qədər sərvəti də yoxdur. Amma onlar əllərindəki pulu düzgün xərcləyirlər. Hər şey düzgün edilsə, uğur qazanmaq olar. Bu tsikldə də olmasa, növbəti seçmə mərhələdə qrupdan çıxmaq olar. Bosniyalıların nə qədər futbolçusu ölkə xaricində oynayır. Qarşılarına hər seçmə mərhələdə yüksək hədəflər qoyurlar. Onlar çalışırlar. Amma Türkiyə və Azərbaycanda belə nəticələr görmürəm.
- Sizə elə gəlmir ki, Türkiyə mətbuatı Azərbaycanın uğurlarına yuxarıdan baxır?
- Hamısı yox. Türkiyə mətbuatında futbolu bilənlər də çox deyil. Bunun da təsiri var.
- Bu yay FİFA "Bursaspor"un hücumçusu Dəniz Yılmazın millimizdə oynamasına dair razılıq verdi. Sizcə, o, komandamıza faydalı ola bilər?
- Yılmaz pis forvard deyil. Niyə də olmasın? Amma məncə, Azərbaycanda daha yaxşı oyunçular tapmaq olar. Onlar daha çox faydalı olarlar. Ölkənizdə oynamışam və bunu gözlərimlə də görmüşəm. Belə futbolçuları tapıb üzə çıxarmaq vacibdir.
- Ramil Şeydayev niyə "Trabzonspor"da oynaya bilmir?
- Onun oyununu görməmişəm. Bircə Çexiya ilə oyundan tanıyıram. Bu üzdən də "Trabzonspor"dakı durumuna qiymət verə bilmərəm. Gəncdir. Öz üzərində çalışsa, mütləq oynayacaq.
- Çempionatımızı izləyirsiniz?
- Azərbaycan çempionatı indi lazım olan səviyyədə deyil. Düzdür, "Qarabağ"la "Qəbələ" avrokuboklarda uğurlu çıxışı ilə seçilir. Amma bununla kifayətlənmək olmaz. Milli çempionatı gücləndirmək lazımdır. Avropa ilə rəqabətdə geri qalmaq olmaz. Ancaq hazırda səviyyə çox aşağıdır.
- Bir ara sizin Azərbaycanda çalışacağınız deyilirdi...
- Mübariz Mənsimovla danışmışdım. O, məni işə dəvət etmək istəyirdi. Amma sonradan rəsmi təklif olmadı. Azərbaycanlılar da məndən tez-tez niyə işləmədiyimi soruşurlar. Amma təəssüf ki, Türkiyə və Azərbaycanda mənə iş yoxdur.
- "Xəzər Lənkəran"ın fəaliyyətini dayandırması faktını necə qarşıladınız?
- Üzüldüm. Belə bir infrastruktura malik klubun indi demək olar ki, çalışmaması üzücüdür. Karyeramın ən yaxşı dönəmlərini orada keçirmişəm. Bu klubla bağlı çoxlu xoş xatirəm var.
