“Neftçidən gələn təklif məni fikrimdən daşındırdı”
"Neftçi"nin yeni transferi Conas Pessalli Topaz Premyer Liqasının 8-ci turu çərçivəsində "Zirə"yə qarşı keçirdikləri oyundan (0:2) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Matçla bağlı nə deyə bilərsiniz?
- Qarşılaşmaya yaxşı hazırlaşmışdıq. Bilirdik ki, bizi çətin oyun gözləyir. Rəqib güclü idi. Hər şey qısa zaman kəsiyində həll oldu. Əvvəlcə qapımıza penalti təyin edildi, az sonra isə azlıqda qaldıq. Təəssüf ki, qələbə qazana bilmədik.
- Komandadakı ab-hava və sərgilədiyin futbol barədə nə deyə bilərsən?
- Buraya gəlməmişdən “Neftçi” barədə yetərincə məlumat toplamışdım. Necə böyük kluba gəldiyimin fərqindəyəm. İşlər ürəkaçan səviyyədə deyil. Mən də kömək etmək üçün gəlmişəm.
- Ancaq debütün uğursuz alındı...
- Elədi, təəssüf ki, uduzduq. Ancaq inanıram ki, qələbələr hələ irəlidədi. İşlər qaydasında getmir. Yaranmış vəziyyətdən çıxamağa çalışacağıq.
- Yəqin ki, həyatında ilk dəfə 2,5 aylıq müqaviləyə imza atdın...
- 5 il Braziliyada, 5 il isə Fransada oynamışam. Bu cür anlaşmaya karyeram ərzində ilk dəfədi ki, rast gəlirəm. Bu, yeni təcrübə və mənim üçün bir çağırışdı. Özümü ən yaxşı tərəfdən göstərməyə çalışacağam.
- Bəs bu cür müqaviləyə niyə imza atdın?
- Burada hər şey yenidən qurulur. Buna görə də, razılaşdım. Hələ adaptasiya olmalıyam. Hər şey qaydasında getsə, karyeramı “Neftçi”də davam etdirmək istərdim. Fransa həyatından sonra Asiyada çıxış etmək istəyirdim. Ancaq “Neftçi”dən gələn təklif məni fikrimdən daşındırdı.
