Kristian Torres: Qəbələ və Qarabağın özünü nə vaxtsa göstərəcəyinə inanırdım
"Qarabağ" və "Qəbələ"nin sabiq yarımmüdafiəçisi Kristian Torresin azerisport.az saytına müsahibəsi
- Keçmiş klublarınızın çıxışını izləyirsiniz?
- Bəli, "Qarabağ"la "Qəbələ"nin işləri ilə maraqlanıram. "Qəbələ"nin çıxışı daha çox maraq doğurur. Komandanın Roman Qriqorçuk kimi güclü məşqçisi var. Onlar Avropa Liqasında yaxşı çıxış edirlər.
- Yəqin ki, bu sözləriniz komandanın təsnifat mərhələsindəki çıxışına aiddir. Çünki qrup mərhələsindəki hər iki oyununda uduzublar...
- Uduzsalar da, yaxşı oynadıqlarını bilirəm. Qriqorçuku yaxşı məşqçi kimi tanıyıram. Vaxtilə o, Latviyada "Ventspils"i çalışdırıb. Onu bütün Latviyada ağıllı məşqçi kimi tanıyırlar.
- Bəs "Qarabağ"ın İtaliya "Fiorentina"sına 1:5 hesablı məğlubiyyəti barədə nə deyə bilərsiniz?
- Həmin oyuna baxdım. "Qarabağ" oyuna əla başlamışdı, rəqibə heç bir şans vermirdi. Qol vurmaq üçün də şansları var idi. Amma qırmzı vərəqədən sonra hər şey dəyişdi. "Fiorentina"ya qarşı 10 nəfərlə oynamaq çox çətindir. Qırmızı vərəqə olmasaydı, "Qarabağ" Bakıya uğurlu nəticə ilə qayıda bilərdi. Əfsuslar olsun ki, bu vərəqə hər şeyi dəyişdi.
- Qriqorçuku təriflədiniz, amma Qurban Qurbanov barədə heç nə demədiniz...
- O, Azərbaycanın ən güclü mütəxəssisidir. Azərbaycandan gedəndən sonra onun "Qarabağ"dakı işi ilə maraqlanıram. Klub onun rəhbərliyi altında ildən-ilə daha da yaxşı çıxış edir. Artıq hər mövsüm çempion olurlar, avrokubokların qrup mərhələsində oynayırlar. Bütün bunlar böyük işlərin nəticəsidir. Qurbanovun bu uğurlarda payı çox böyükdür.
- Bəs bu klublardan hansısa sizi heyətində görmək istəsə, qayıdarsınız?
- Hər iki klubla münasibətim yaxşıdır. Orada hansı işlərin getdiyini görmüşəm. "Qarabağ" və "Qəbələ"nin nə vaxtsa özünü göstərəcəyinə inanırdım.
- Bu iki komanda sizin çıxış etdiyiniz dövrlə müqayisədə çox dəyişib?
- Hazırda Azərbaycanda fərqli çempionat keçirilir. "Qarabağ"la "Qəbələ" çox güclüdür. Amma əvvəllər "Bakı", "Neftçi", "Xəzər Lənkəran", "İnter" də güclü idi. Onların arasında çox gərgin mübarizə gedirdi. Hazırda "Qarabağ"la "Qəbələ" Avroliqanın qrup mərhələsində çıxış edirsə, deməli, hər iki klubun işləri peşəkar səviyyədə qurulub.
- Amma qayıtmaq barədə heç bir fikir sösləndirmədiniz...
- Latviyada xoşbəxtəm. Burada ailəm var.