Zaur Svanadze: Qolu rəqibə hədiyyə etdik
"İnter"in baş məşqçisi Zaur Svanadze Azərbaycan Premyer Liqasının 7-ci turu çərçivəsində "Zirə"yə qarşı keçirdikləri oyunu şərh edib. Azerisport.az xəbər verir ki, "bankirlər"in gürcü çalışdırıcısı 1:1 hesabıyla bitən qarşılaşmadan sonra bunları söyləyib:
"Birinci hissədə oyuna biz nəzarət edirdik. Ancaq ikinci hissədə rəqib təzyiqi gücləndirdi. Onlar cinah asmalarından istifadə etməyə başladılar. Futbolçularımızın bəzisi sıradan çıxdı. Bunun da nəticəsində qol buraxdıq, daha doğrusu rəqibə hədiyyə etdik. Bir xal qazandıq. Gələcək oyunlara köklənəcəyik. Ümid edirəm ki, zədəlilər tezliklə sıraya qayıdacaqlar. Futbolçular bir qədər aqressiv görünürdülər. Onlar belə davranmalı deyildilər. Qolun son dəqiqələrdə buraxılması onlara təsir etdi. Ancaq futbol gözlənilməzlikləri ilə gözəldi. Zədələrin olmasına baxmayaraq, müdafiədə oturmaq istəmirdik. Fasilə dövründə öz bazamızda toplaşacağıq. Bir yoxlama oyunu keçirməyi planlaşdırırıq. Amma hələ kiminlə qarşılaşacağımızı bilmirik".