Vitali Vernidub: Qəbələ ilk oyundakı məğlubiyyətə layiq olmadığını isbatlamalıdı
"Qəbələ"nin müdafiəçisi Vitali Vernidub Avropa Liqasının qrup mərhələsi çərçivəsində Almaniyanın "Maynts" klubuna qarşı oyun öncəsi azerisport.az saytının suallarını cavablandırıb:
- "Qəbələ"nin almanlarla ev oyununda qələbə qazanmaq şansı var?
- Bizim üçün təkcə ev oyunları yox, Avroliqadakı bütün matçlar önəmlidir. İlk turda elə alındı ki, "Anderlext"lə oyunda meydanı məğlub tərk etdik. Artıq "Maynts"la oyuna hazırlaşırıq. Komandada motivasiya əladır. Qarşıdakı oyunda özümüzü yaxşı tərəfdən göstərmək istəyirik. Həm də sübut etməliyik ki, ilk turda Belçikadakı məğlubiyyətə layiq deyildik.
- "Maynts"ın heyətində kimi xüsusi qeyd edərdiniz?
- Onların bir neçə oyununa baxmışıq. Məşqçilərimiz rəqib, futbolçuları barədə bizə məlumat veriblər. Məlumatımız var. Bunlardan yararlanıb, uğur qazanmağa çalışacağıq.
- Premyer Liqanın son turunda "Zirə" üzərində çətin qələbə qazandınız. Həmin oyunda çox güc itirdiniz?
- Elə də asan oyun olmadı. Çünki "Zirə" çox güclü komandadır. Bizə qarşı yaxşı mübarizə apardılar. Amma biz həm hücumda, həm də müdafiədə inamlı oynayaraq, qələbə qazandıq. Ədalətli qələbə oldu.
- Teo Uiks də nəhayət bu oyunda çempionatdakı qol hesabını açdı...
- O, bu oyunda özünü çox yaxşı tərəfdən göstərdi, dubla imza atdı. Hücumlarımızda həmişə fəal iştirak edir. Məşqçinin tapşırıqlarını düzgün yerinə yetirir. Teo öz çıxışından razıdır.
- "Qəbələ"nin altı turdan sonra lider olacağını çox adam gözləmirdi...
- Bu liderlik çox şeydən xəbər vermir. Çünki cəmi altı tur geridə qalıb. Hər şey qarşıdadır. Əlbəttə, liderlik xoşdur. Amma komanda olaraq daha çox çalışmalı olduğumuzu anlayırıq.
- Çempionatda əvvəl keçirdiyiniz oyunlar arasında hansı daha çətin olub?
- Hər bir oyunumuz çətindir, hamısı prinsipial mübarizə şəaitində keçib. Hansı oyunun daha çətin keçdiyini söyləmək çətindir. Sadəcə, bizim öz oyunumuz hərdən alınır, hərdən alınmır. İstənilən oyuna qələbə üçün çıxırıq.
