Aleksandr Çivadze: Neftçi rəhbərliyi bu vəziyyətdən mütləq çıxış yolu tapmalıdır
SSRİ yığmasının sabiq müdafiəçisi, Gürcüstan yığmasının keçmiş baş məşqçisi Aleksandr Çivadzenin azerisport.az saytına müsahibəsi
- Azərbaycanlı futbolçulardan kimlərlə sıx əlaqələriniz qalıb?
- Daha çox İsgəndər Cavadov və Maşallah Əhmədovla. Onlarla futbolçu karyeramızı başa vurandan bəri münasibətimiz qalmaqdadır.
- Yəqin ki, Azərbaycan futbolunu izləyirsiniz...
- Bəli. Çünki burada oynamışam. Bundan əlavə, Azərbaycanda çalışan gürcü məşqçilər, top qovan həmyerlilərimiz var.
- Yeri gəlmişkən, onların sayı getdikcə azalır. Bunu nə ilə əlaqələndirərdiniz?
- Bunu futbolçuların özündən soruşun (gülür).
- Ola bilər ki, bizim futbolda pulun azalması və ya klublarımızın səviyyəsinin qalxması nəticəsində gürcü futbolçular standartlara cavab vermədiyi üçün Azərbaycanı tərk edirlər?
- Hər klubun öz iddiası olur. Yəqin ki, klublarınız daha güclü futbolçular axtarırlar.
- Azərbaycan futbolu Gürcüstandan necə görünür?
- Mütəmadi izləməyə çalışırıq. Məncə, "Qarabağ"la "Qəbələ"nin Avropa Liqasının qrup mərhələsində oynaması uğurdur.
- Gürcüstan futbolunun Azərbaycandakından geri qaldığını söyləmək olar?
- Gürcüstanda futbol bir nömrəli idman növüdür və hələ inkişafdadır. Hazırda ölkənizin klub futbolunda uğurlar var və bunu alqışlayıram. Bu, səviyyənin artmasından xəbər verir. Bunun legionerlərin və ya yerli futbolçuların sayəsində baş tutması isə başqa söhbətin mövzusudur.
- Tarixinin ən pis dönəmini yaşayan "Neftçi" barədə nə deyə bilərsiniz?
- "Neftçi"ni Tiflis "Dinamo"su ilə müqayisə edərdim. Bizim üçün bu, faciə olardı. Əminəm ki, sizin ölkənizdə də belədir. "Neftçi"nin bu səviyyəyə enməyə haqqı yoxdur. Klub rəhbərliyi mütləq bu vəziyyəti düzəltməlidir.