İqor Ponomaryov: İstədik ki, Neftçi İsveçdə də olsun
Azərbaycanın veteran futbolçusu, İsveçdə yaşayan həmyerlimiz İqor Ponomaryov İsgəndər Cavadovun 60 illik yubileyi münasibətilə nəşr olunmuş kitabın təqdimat mərasimindən sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Bakıya səfərinizdə məqsəd yalnız İsgəndər Cavadovun yubileyində iştirak etməkdir?
- Bəli, təkcə bu bayrama görə gəlmişəm. Təşəkkürümü bildirirəm ki, məni dəvət ediblər. Biz birgə böyümüşük. Dostluğumuz var. Bir-birimizin evindəki problemlərə qədər xəbərimiz olur, həyatımızın xoşbəxt anlarını birgə bölüşürük. Tez-tez əlaqə saxlayırıq, söhbətləşirik.
- Yubilyarın yubiley günlərində keçmiş komandası "Neftçi" heç də yaxşı günlərini yaşamır...
- Bu barədə heç nə deyə bilmərəm. Çünki mənə bu haqda nəsə danışmaq çətindir. Bircə nəticələrindən xəbər tuta bilirəm. Orada nə baş verdiyini söyləmək çətindir.
- Sizcə, komandanı bu vəziyyətdən çıxarmaq üçün nə etmək lazımdır?
- Bunun üçün rəhbərlik var. Onlar bir çıxış yolu tapmalıdırlar. Lazım olsa, hər zaman kömək etməyə hazırm. Amma belə, təbii ki, komandanı bu cür vəziyyətdə görmək ağırdır.
- İsveçdə nə işlə məşğulsunuz?
- Orada "Neftçi-Stokholm" komandası yaratmışıq. Klub Azərbaycanın Stokholmdakı Konqressinin dəstəyi sayəsində yaranıb. Amma hələ heç bir yerdə oynamırıq. İlk addımlarımızı atırıq.
- Orada yalnız azərbaycanlılar oynayacaq?
- Xeyr. Belə bir məhdudiyyət yoxdur. Sadəcə, ölkəmizi populyarlaşdırmaq istəyirik. İsveçdə Türkiyə komandaları var. Qoy "Neftçi" də olsun.
- Azərbaycandan sizə təklif yoxdur?
- Xeyr. Heç buna cəhd də göstərmirəm.
- Oğlunuz nə işlə məşğuldur?
- Onun menecerlik agenti var. O da bu yolda yenicə addımlamağa başlayıb.
