Vaqif Cavadov: Sumqayıt Neftçi üzərində layiqli qələbə qazandı
"Sumqayıt"ın hücumçusu Vaqif Cavadov Topaz Premyer Liqasının 6-cı turu çərçivəsində "Neftçi"yə qarşı keçirdikləri oyundan (2:1) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Oyun barədə nə deyə bilərsiniz?
- Hər iki komanda qələbə qazanmaq istəyirdi. Amma biz bunu daha çox istədiyimizə görə qalib gəldik. Şadam ki, buna məhz nail olduq. Komanda olaraq mübarizə apardıq və layiqli qələbə qazandıq. Rəqib barədə heç nə danışmaq istəmirəm. Onlara uğurlar arzulayıram.
- Demək olar ki, "Neftçi"nin indiki vəziyyəti qələbə qazanmağınıza kömək etdi?
- Mən elə deməzdim. "Neftçi" "Neftçi"dir. Sadəcə, biz güclü idik və bunu sübut etdik. Bundan öncə "Qəbələ"yə son dəqiqələrdə buraxdığımız qollarla uduzsaq da, toparlana və yaxşı oyun sərgiləyə bildik.
- Robert Prosineçki də oyunu izləyənlər arasında idi. Bu, sizə əlavə stimul verir?
- Mənim üçün stimul komandam, ailəmdir. Meydanda bacardığımın ən yaxşısını etməyə çalışıram.
- Xorvatiyalı mütəxəssisdən dəvət gözləyirsiniz?
- Mən yığmaya dəvəti həmişə sevinclə qarşılamışam. Bir neçə il yığmada çıxış etmişəm. İndi də köməyim lazım olsa, hazıram
- Sabah İsgəndər Cavadovun yubileyidir. Ona nə hədiyyə edəcəksiniz?
- Onu təbrik edirəm. Əmim Azərbaycan futbolunun əfsanəsidir. Bizdə onun kimi futbolçunun olacağını düşünmürəm. Amma istərdim ki, olsun.
- Nə hədiyyə edəcəyinizi demədiniz...
- Onun hər şeyi var (gülür).
- Yeri gəlmişkən, sosial şəbəkələrdə sizi çox lağa qoyurlar. Bundan incimirsiniz?
- Bunlara diqqət yetirmirəm. Allah hamısına can sağlığı versin (gülür).
- Çoxdan idi mətbuata danışmırdınız. Kimdənsə küsməmisiniz?
- Heç kimdən incik deyiləm. Mən tənqidin əleyhinə deyiləm. Amma hərdən ünvanıma yersiz tənqidin də şahidi oluram.