Denilson: Neftçinin bu cür vəziyyətə düşməsini mən də istəmirəm, amma...
"Neftçi"nin hücumçusu Denilson Topaz Premyer Liqasının 6-cı turu çərçivəsində "Sumqayıt"a qarşı keçirdikləri oyundan (1:2) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Niyə məhz "Neftçi"ni seçmisiniz?
- Təklif gəldi, "Neftçi" ilə maraqlandım və böyük klub olduğunu öyrəndim. Digər futbolçular kimi, mən də kömək etməyə gəlmişəm.
- İnternetdə öyrəndiyiniz "Neftçi"ni burada görə bildiniz?
- "Neftçi" həmişə böyük klub olub. İndiki nəticələr baxmayaraq, yenə də böyük klub olaraq qalmaqdadır.
- Amma sizin yeni komandanızda oyununuz alınmır...
- Bacardığımı edirəm. Sadəcə, qol vurmaq alınmır. "Açılmaq" üçün mənə bircə qol lazımdır. Amma hər şey tək məndən asılı deyil.
- Qazandığınız pulun qarşılığını verdiyinizi düşünürsünüz?
- Sizə elə gəlir ki, mənə bu cür məğlubiyyət asandır? Mən ailəmi orada qoyub buna görə bura gəlməmişəm ki, bu cür vəziyyətlə üzləşim. Mən də belə halların yaşanmasını istəmirəm. Amma yenə də deyirəm ki, komandamızın düşdüyü bu vəziyyət tək məndən asılı deyil.
- Bəs kimdən asılıdır?
- Hamımızdan, bütün futbolçulardan.
- Klub rəhbərliyi, məşqçilər korpusu legionerlərin səviyyəsindən narazıdır və yəqin ki, qışda əksəri göndəriləcək. Artıq özünüzə yeni klub axtarmağa başlamısınız?
- Mən indi sizə gedəcəyimə və ya qalacağıma dair dəqiq heç bir söz deyə bilmərəm. Daha yaxşı oynamaq istəyirəm ki, komandada qalım. Məqsədim budur.