Coşqun Diniyev: Layiq olan qalib gələcək
"Qarabağ"ın yarımmüdafiəçisi Coşqun Diniyev Topaz Premyer Liqasının 6-cı turu çərçivəsində "Kəpəz"ə qarşı keçirdikləri oyundan (1:1) sonra azerisport.az saytının suallarını cavablandırıb:
- Matçla bağlı fikirləriniz?
- Çətin olacağını bilirdik. Gəncə səfəri ən çətin səfərlərdən biri hesab olunur. "Kəpəz" doğma meydanda uğurlu çıxış edir. Həm də stadionun qazonu ağır vəziyyətdə olduğundan bizə mane olurdu. Bütün bunları bilsək də, qələbə qazanmaq istəyirdik. Alınmadı, bir xalla kifayətlənməli olduq. Ola bilsin ki, bəxtimiz gətirmədi.
- Heç-heçəni ədalətli nəticə hesab edirsiniz?
- Matç heç-heçə bitdisə, deməli, heç-heçə ədalətli nəticədir. Hər iki komanda çox qol vurmağa çalışdı. Lakin gördüyünüz kimi, qarşılaşma 1:1 hesabıyla bitdi.
- "Qarabağ" sanki buraxılan qoldan sonra toparlana bilmirdi...
- Mən belə hesab etmirəm. Qazon oyunumuza təsir göstərirdi. Topla istədiyimiz kimi davrana bilmirdik. İstədiyimiz oyunu sərgiləyə bilməməyimizi buraxdığımız qolla əlaqələndirməzdim.
- Atanızın çalışdığı, qardaşınızın oynadığı komandaya qarşı mübarizə apardınız. Oyundan sonra söhbətiniz oldu?
- Ötən mövsüm bu suala cavabım emosional alınmışdı. Amma indi buna alışmışam. Çünki ötən mövsüm dörd belə oyunumuz olmuşdu.
- Növbəti turda rəqib "Qəbələ"dir. Hələ də qol buraxmayan bu komanday qalib gələcəyinizə inanırsınız?
- İstənilən komanda xal itirə bilər. Bu, realdır. Hər bir komanda meydana qələbə üçün çıxır. "Qəbələ" ilə oyun bizim üçün xüsusi olacaq. Fikrimcə, layiq olan qalib gələcək.
