Sezar Meza Kolli: Zirədə heç bir problem yoxdur
"Zirə"nin hücumçusu Sezar Meza Kollinin azerisport.az saytına müsahibəsi
- Premyer Liqanın son turunda "Qəbələ"yə uduzmağınıza (0:2) nə səbəb oldu?
- Birinci hissədə yaxşı çıxış etdik. Amma uğur bizim tərəfimizdə olmadı. Ardından ikinci qolu buraxdıq və demək olar ki, matçın taleyi həll olundu. Ondan sonra bizim dönüş yaratmaq şansımız qalmamışdı.
- Rəqib layiqli qələbə qazandı?
- Layiq olub-olmadıqlarını bilmirəm. Amma biz ən azı heç-heçə edə bilərdik. Sadəcə, bu görüşdə qol vurmağı bacarmadıq. Bu, uğursuzluqdur.
- "Zirə" mövsümə uğursuz başlayıb. Altı oyunda dörd məğlubiyyətin səbəbi nədir?
- Məşqlərdə yaxşı çalışırıq. Fikrimcə, tezliklə bunun bəhrəsini görəcəyik. Qələbələrimiz qarşıdadır.
- Belə uğursuz gedişat adətən baş məşqçi istefası ilə nəticələnir. Adil Şükürovun istefaya göndəriləcəyindən ehtiyatlanmırsınız?
- Onu komandadan göndərməyə səbəb yoxdur. Biz baş məşqçimizdən razıyıq. Komandada hər şey yaxşıdır. Qarşıdakı "İnter"lə oyunda nəyə qadir olduğumuzu göstərməyə çalışacağıq. İşimizi davam etdirməliyik.
- Baş məşqçi işini düzgün görürsə, bəlkə futbolçular maaşlarını, mükafatlarını vaxtında almırlar...
- Xeyr, bizdə belə problem yoxdur. Biz hər şeydən razıyıq. Gücümüzü birləşdirib bu vəziyyətdən çıxacağıq.