Maksim Medvedev: Gəncədə 1 xal qazanmaq pis nəticə deyil
"Qarabağ"ın müdafiəçisi Maksim Medvedev Topaz Premyer Liqasının 6-cı turu çərçivəsində "Kəpəz"ə qarşı keçirdikləri səfər oyunundan (1:1) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Heç-heçəyə görə sevinməyə dəyər?
- Birinci hissədə oyunumuz alınmadı. Axşam yağış yağdığından meydança ağır vəziyyətdə idi. Amma fasilədən sonra uyğunlaşdıq və daha yaxşı oynamağa, topa nəzarət etməyə başladıq. Baxmayaraq ki, meydançanın vəziyyəti topla istədiyimiz kimi davranmağa imkan vermirdi. Bir xal pis nəticə deyil. Həm də nəzərə almaq lazımdır ki, biz matçın gedişində məğlub durumda idik.
- Bəlkə Gəncəyə oyun günü gəlməyinizin təsiri oldu?
- Hesab edirəm ki, belə daha yaxşıdır. İmkan varsa, bu cür etmək lazımdır. Yol cəmi bir saat çəkir.
- Təyyarə ilə gəlmək maddi baxımdan da sərfəlidir?
- Mən belə məsələlərə qarışmıram. Bircə onu deyə bilərəm ki, bizim üçün rahat oldu. Bakıda hər cüt şəraitimiz var, bazamızda qalırıq, sonra isə oyuna yollanırıq. Təyyarə ilə Gəncəyə gəlmək avtobusla Bakıdan Sumqayıta getmək qədər vaxt alır.
- İkinci hissədə İlqar Qurbanovla əvəzlənməyinizin xüsusi bir səbəbi var idi?
- Bu sualı baş məşqçiyə verməyiniz daha yaxşı olardı. O, meydanın ağır olduğunu görürdü. Həm də rəqibin heyətində də Nicat Qurbanov yenicə meydana çıxmışdı.
- Bəlkə sizi Avropa Liqası çərçivəsində qarşılaşacağınız İtaliya "Fiorentina"sı ilə oyun üçün qoruyurdu?
- Ola bilər ki, Qurban Qurbanov "Fiorentina" ilə oyun öncəsi heç birimizin zədələnməsini istəmirdi. Hər halda həmin oyuna da hamımız tam hazır olmalıyıq.
- Florensiyada keçirəcəyiniz oyundan nə gözləyirsiniz?
- Çox maraqlı oyun olacağını gözləyirik. Biz futbolçular "Fiorentina”nın necə böyük komanda olduğunu bilirik. "Qarabağ" Avropada 3-4 ildir tanınır. Amma azarkeşlərimiz bizdən çox şey gözləyir. Hətta elələri var ki, "Fiorentina”nın "Real” gücündə olmadığını deyir. Ancaq başa düşmək lazımdır ki, "Fiorentina” həm səviyyəsinə, həm də oyunçularına görə "Qarabağ”dan üstündür. Bizim üçün çox çətin oyun olacaq.