Samir Abasov: Sözlərim rəhbərliyin xoşuna gəlməsə, məni qova bilər
"Sumqayıt"ın baş məşqçisi Samir Abasov Azərbaycan Premyer Liqasının 3-cü turundan təxirə salınmış "Qəbələ"yə qarşı keçirdikləri oyunu şərh edib. Azerisport.az xəbər verir ki, sumqayıtlıların çalışdırıcısı 0:2 hesabıyla bitən qarşılaşmadan sonra bunları söyləyib:
"Matçın belə bir ssenari ilə keçəcəyini gözləyirdik. Əks-hücumlara üstünlük verdik. Birinci hissədə uyğunlaşdıq. Amma yenə də çətin idi. Mən oynadığım dövrdə də belə idi. Qol şanslarımız oldu, amma yararlana bilmədik".
"Rəqibə iradım yoxdur. Amma mənə maraqlıdır ki, Roman Qriqorçuk də mənim kimi məşqçidir. Kifayət qədər də qazanır. Ona əsəbləşmək, söyüş söymək olar, mənə yox? İlk qol epizodunda ofsayd var idi. Hakimə də dedim ki, bizim oyundankənar vəziyyətimizi qeydə alırsansa, buna niyə göz yumursan? Əsəbləşdim və texniki zonadan uzaqlaşırıldım. Bütün bunlar məni çox məyus edir. Qələbəyə yaxın idik. Bax bu, daha üzücüdür. Xalımızı əlimizdən aldılar".
Abasov heyətlə də bağlı narazılığını dilə gətirib: "Mövsümə bircə sağ cinah müdafiəçisi ilə başlamışıq. Buna baxmayaraq, qarşımıza yüksək hədəflər qoyuruq. Amma başqa klublarda bir mövqeyə 2-3 oyunçu var. Kimdir günahkar? Rəhbərlikdən soruşun. Mən qovulmaqdan qorxmuram. Nə var, onu deyirəm. Rəhbərlik sözlərimdən xoşlanmasa, məni qova bilər".
"Qriqorçuk mənim özümü ələ almağımı məsləhət görür? O, məni sakitləşdirməməlidir. Necə sakit olum ki, bizə ofsayddan qol vururlar?"
