Elvin Məmmədov: Ötən mövsüm zəif komandalar daha çox idi
"Zirə"nin kapitanı Elvin Məmmədov Topaz Premyer Liqasının 5-ci turu çərçivəsində "Qarabağ"a uduzduqları (0:2) oyundan sonra azerisport.az saytının suallarını cavablandırıb:
- "Zirə" demək olar ki, "Qarabağ"ın qapısına yaxın düşə bilmədi. Niyə komandanızın oyunu alınmadı?
- Baş məşqçinin tapşırıqlarını yerinə yetirməyə çalışdıq. Amma "Qarabağ" bizi müdafiədən oynamağa məcbur etdi. Buna görə də oyunumuz alınmadı və uduzduq.
- Komandanızın üzvləri də demək olar ki, heç nə ilə yadda qalmadılar...
- O dərəcədə passiv olduğumuzu deməzdim. Son 15 dəqiqədə normal oynadıq. Sadəcə, son ötürmələrdə problem olurdu.
- Razısınız ki, ötən mövsüm "Zirə" daha güclü idi?
- Razıyam ki, həmin komanda daha çox qələbə qazanırdı. Nəticə olanda hamı danışır. Amma bu mövsüm iki qələbə qazanıb, üç oyunda uduzmuşuq.
- Belə oyunla, bu heyətlə avrokuboklara vəsiqə uğrunda mübarizə apara biləcəksiniz?
- Hər kəsin öz fikri, işə öz yanaşması var. Biz də buraya komandanı gücləndirmək üçün gəlmişik. Sualınız barədə isə heç nə deyə bilmərəm. Klubun rəhbərliyi, məşqçiləri var. Heyəti onlar müəyyənləşdirirlər. Niyə avrokuboklara düşməyək ki? Futbolda hər şey mümkündür.
- Komandada çatışmazlıqlar çoxdur?
- Əlbəttə. Yeni komandayıq. Ötən mövsümdəki heyətdən 8-9 futbolçu gedib. Sistem də fərqlidir. Ötən mövsüm daha çox müdafiədən oynayırdıq. Bu mövsüm isə daha çox topla oynamağa çalışırıq.
- Ötən mövsüm komandada Nelson Bonilya kimi vuran ayaq var idi. Bu mövsüm isə hücumçusuz oynayırsız. Nurlan Novruzov olsa da, hücumda Viktor İqbekoyi çıxış edir...
- Bu sual mənə ünvanlanmamalıdır. Mən də komandamızda yaxşı hücumçuların olmasını istərəm. Amma bu işlə rəhbərlik, baş məşqçi məşğul olur. Elə məqamlar var ki, onları biz bilmirik. Mən də istərdim ki, üç hücumçumuz olsun, rəqabət artsın.
- Bəlkə rəqibləriniz daha güclənib?
- Ötən mövsüm zəif klublar daha çox idi. Bu mövsüm isə çempionatda cəmi 8 klub var. "Qarabağ"la "Qəbələ"dən başqa bütün klublar eyni səviyyədədir. İndi daha çətinləşib.
- Çempionluq yolunda favoritiniz "Qarabağ"dır, ya "Qəbələ"?
- Yəqin ki, "Qarabağ" çempion olacaq.