Cavid İmamverdiyev: Neftçi çempionluğa da oynaya bilər
"Neftçi"nin yarımmüdafiəçisi Cavid İmamverdiyev Topaz Premyer Liqasının 5-ci turu çərçivəsində "İnter"ə qarşı keçirdikləri oyundan (1:2) sonra jurnalistlərin suallarını cavablandırıb. Azerisport.az sizi həmin müsahibə ilə tanış edir:
- Qələbəni əldən verməyinizə nə səbəb oldu?
- Hər komanda o cür acı məğlubiyyətdən sonra belə oyun göstərə bilməzdi. Ancaq “Neftçi” kimi komanda belə qısa müddətdə toparlana bilərdi. Bu görüşdə qalib gəlməli idik. Buna borclu idik. Azarkeşlərimiz belə bir qələbəyə layiq idilər. Amma müdafiədə buraxdığımız səhvlər qolla nəticələndi. Belə sonluğu gözləmirdim.
- Ancaq həmin azarkeşlər 90 dəqiqə ərzində futbolçuları söyür, rəhbərliyi istefaya səsləyirdi...
- Bu, onların haqqıdı. Çünki biz onları oyunumuzla məyus edirik. 0:8-dən sonra başqa nəsə gözləmək də olmazdı. Artıq onların da səbri tükənib. Fikrimcə, hazırkı məqamda haqlıdılar. Hər şeyə rəğmən, biz onları sevirik.
- Bu məğlubiyyət acınacaqlı oldu, yoxsa “Qəbələ” ilə oyundakı?
- “Neftçi” üçün bütün məğlubiyyətlər acınacaqlıdır. Çünki bu komanda Azərbaycanın “flaqman”ıdı, xalqın komandasıdı. Əlbəttə ki, “Qəbələ” ilə matçda 8 top buraxmaq bizi daha çox üzmüşdü. “İnter”ə də acınacaqlı şəkildə uduzduq.
- Bəlkə əcnəbi futbolçuların səviyyəsi aşağı olduğu üçün komanda uğursuz nəticələr göstərir?
- Bu barədə nəsə deməyim doğru olmaz. Çünki mən də onlar kimi, futbolçuyam. Heç kim haqda pis danışa bilmərəm. Rəhbərliyimiz, baş məşqçimiz var. Buna qiymət vermək onların işidi.
- Öz oyununuzdan razısınız?
- Xeyr. Sağ olsun, Elxan Abdullayev mənə inanır. Mənə deyib ki, yaxşı məşq elə, söz verirəm ki, səni milliyə də göndərəcəyəm. Mən də əlimdən gəldiyi qədər çalışıram. Demirəm ki, Vəli Qasımov mənə inanmırdı. Sadəcə, onun vaxtında çox oynamırdım.
- Elxan Abdullayevin gəlişindən sonra məşqlərdə fərq hiss edirsiniz?
- Hər məşqçinin öz taktikası, fərqli məşqləri olur. Deyərdim ki, indi komandada əhval-ruhiyyə düzəlib. Normalda 0:8-dən sonra 4-5 oyun özümüzə gəlməməliydik. Amma “Neftçi” peşəkar komandadı. Belə məğlubiyyət futbolda ayda-ildə bir dəfə təsadüfən olan şeydi. Müsbət mənada dəyişiklik var.
- Rəhbərlik komandanın qarşısına minimum 3-cü yeri tutmağı məqsəd qoyub. Bu komanda ilə hədəfə çatmaq mümkündümü?
- Bu hədəfə çata bilərik. Belə davam etsək və azarkeşlərimiz də arxamızda olsa, hətta çempionluğa da oynaya bilərik.