Qarabağın yeni qapıçısı: Bakıya heyran qalmışam
"Qarabağ"ın yeni qapıçısı Boyan Şaranov Topaz Premyer Liqasının 5-ci turu çərçivəsində “Zirə”yə qarşı keçirilən oyunda (2:0) debüt etdi. Matçdan sonra o, jurnalistlərə müsahibəsində azerisport.az saytının əməkdaşının da suallarını cavablandırdı:
- Debüt oyununuz barədə nə deyə bilərsiniz?
- Bu oyun mənim üçün xüsusi əhəmiyyət kəsb edirdi. Çünki cəmi 15 gündü yeni komandamın düşərgəsindəyəm. Ona görə də bu qələbəyə görə sevrinirəm.
- Öz oyununuzdan razı qaldınız?
- Düzdü, bu gün meydanda çox işim olmadı. Əsas o idi ki, konsentrasiyanı itirməyim. Fikrimcə, bu, məndə pis alınmadı.
- Komandanızın əsas qapıçısı İbrahim Şehiç bosniyalı, sən isə serbsən. İki ölkənin siyasi münasibətlərində ciddi problemlər olduğunu nəzərə alsaq, sizin aranızdakı münasibətlər necədir?
- Şehiç mənə ən yaxın insanlardan biridir. Bizim işimiz futbol oynamaq, komandaya faydalı olmaqdır. Əl-ələ verib, "Qarabağ"ın uğurları üçün çalışırıq.
- Avropa Liqasında oynamaq şanslarını necə qiymətləndirərdin?
- Bu barədə dəqiq nəsə deyə bilmərəm. Çünki əsas heyətdə kimin oynamasına baş məşqçi qərar verir. Mənim işim məşq etmək, formada qalmaqdır. Şansımı gözləyirəm.
- Yəqin ki, Azərbaycana gələndə çox vaxt ehtiyatda qalacağını bilirdin. Yoxsa Şehiçi əsas heyətdən kənarlaşdıracağına əminsən?
- Yenə də deyirəm, kimin ehtiyatda olacağına baş məşqçi qərar verəcək. Azərbaycana gələndə, ehtiyatda qalacağımı, yaxud əsas heyətdə olacağımı fikirləşməmişəm. Məşq edib, şans qazanmaq və özümü doğrultmaq istəyirəm.
- “Xəzər Lənkəran” vaxtilə Avropa Liqasında İsrailin “Makkabi” klubuna 0:8 hesabıyla uduzanda Hayfa təmsilçisinin qapısını sən qoruyurdun. O oyunu xatırlayırsan?
- Yaxşı xatırlayıram. Həmin gün şans bizim tərəfdə idi. Qapıya vurduğumuz bütün zərbələr qol oldu.
- Həmin qarşılaşmada “Xəzər Lənkəran”ın kapitanı olan Rahid Əmirquliyevlə bu gün “Qarabağ”da komanda yoldaşısız. Onunla o oyun barədə söhbətiniz düşüb?
- Az da olsa, danışmışıq.
- “Xəzər Lənkəran”ın artıq dağıldığını bilirsən?
- Bəli, xəbərim var. Onu da bilirəm ki, bu komanda Azərbaycanın yaxşı klublarından biri olub.
- Azərbaycan haqda fikrin nədi? Adaptasiya problemin var?
- Etiraf edim ki, Bakıya heyran qalmışam. Bu barədə ailə üzvlərimə də demişəm. Onlara dedim ki, Bakı çox gözəl şəhərdir. İlk dəfə bura gələndə şoka düşmüşdüm. Avropanın böyük şəhərlərindən heç nədə geri qalmır.