“Əminəm ki, Azər Əliyev Azərbaycan millisinin aparıcı üzvlərindən biri olacaq”
Rusiyanın "Yenisey" klubunun futbolçusu Azər Əliyevin keçmiş meneceri, hazırda "Ximki"nin baş direktoru olan Tajutdin Kaçukayev bu yarımmüdafiəçinin karyerasını Azərbaycanda davam etdirmək perspektivindən söz açıb. Azerisport.az saytına açıqlamasında o, bunları söyləyib:
"Azər Əliyev güclü futbolçudur. Onun aı ÇSKA, "Lokomotiv", "Anji" kimi klublarla yanaşı çəkilir. AFFA rəsmiləri, şəxsən Riad Rəfiyev (AFFA-nın seleksioneri) son üç ildə dəfələrlə bu futbolçuya görə mənimlə əlaqə yaradıblar, onu yığmada görmək istədiklərini söyləyiblər. AFFA rəsmiləri Azərin tarixi vətənində oynamalarını istəyirlər.
Yığmanın baş məşqçisi Robert Prosineçki bu il köməkçisi Elxan Abdullayevi "Yenisey"in oyununa yollamışdı. Biz Moskvada görüşdük, Azərin gələcək karyerası ilə bağlı müzakirələr apardıq.
Əliyev oyundan-oyuna daha da inkişaf edir. O, Rusiyanın gənclərdən ibarət yığmasında oynayacağına ümid bəsləyirdi. 2015-ci ildə "Yenisey"ə Omari Tetradze rəhbərlik edirdi. O, bu futbolçuda böyük potensial olduğunu bildirirdi. Təsadüfi deyil ki, Rusiya birinci liqasının birinci dövrəsindən sonra ən yaxşı oyunçuların reytinqində Azər ikinci sırada qərarlaşmışdı. Amma ona yenə də yığmadan dəvət gəlmədi. Fikrimcə, Nikolay Pisarevin rəhbərlik etdiyi məşqçilər korpusu ona qarşı düzgün mövqe nümayiş etdirmədilər.
Yayda biz Rusiya Premyer Liqasında çıxış edən klublarla danışıq apardıq. Amma futbolçunu buraxmaq üçün çoxlu transfer məbləği tələb olunurdu. Həm də klub rəhbərliyi onu başqa variantlara baxmamağa inandırdılar. Halbuki, hazırda onu hazırda oynatmırlar. Mənim fikrimcə, Andrey Tixonov onu əsas heyətdə görməməklə səhv edir. Bunu "Yenisey"in turnir cədvəlindəki mövqeyi də təsdiqləyir.
Hazırda Əliyevin menecerliyini öz atası edir. Bildiyimə görə, onun həm ailəsi, həm də atası futbolçunun Azərbaycan çempionatında oynamasına, milliyə dəvət almasına razıdır. Əminəm ki, Əliyev Azərbaycan yığmasının aparıcı futbolçularından biri olacaq, Qarayevin, Hüseynovun, Şeydayevin, Mahmudovun yanında öz potensialını aça biləcək.
Mən də Azərə öz futbol xoşbəxtliyini Bakıda tapmağı arzulayıram. O, hər şeydən öncə özünü sübut etməlidir. İkinci növbədə isə rusiyalı mütəxəssislərə. O, Rusiya Premyer Liqasında oynamağa layiq olduğunu isbatlamalıdır".
