Qara Qarayev: İstərdik ki, ÇL-in qrupunda oynayaq, amma Avroliqa da yaxşıdır
"Qarabağ"ın yarımmüdafiəçisi Qara Qarayev Avropa Liqasının pley-off mərhələsi çərçivəsində İsveç "Qöteborq"una qarşı keçirdikləri cavab oyunundan (3:0, ilk oyun 0:1) sonra azerisport.az saytının da suallarını cavablandırıb:
- Oyunla bağlı nə deyərdiniz?
- Öncədən üzr istəyirəm ki, soyuqlamışam və çox danışa bilməyəcəyəm. Qazona görə çətin şərtlər altında oynadıq. Buna baxmayaraq, əsl komanda kimi mübarizə apardıq. Düşündüklərimizi həyata keçirdik. Üçüncü qoldan sonra artıq cütün taleyinə aydınlıq gəlmişdi. Bu oyun karyeramdakı ən vacib görüşlərdən biri oldu. Ola bilsin ki, bir də belə bir şans ələ düşməyəcək.
- Komanda yoldaşlarınız arasında ən yaxşı kimi hesab edirsiniz?
- Bu gün meydanda zəif futbolçu yox idi.
- "Qarabağ" ardıcıl üçüncü dəfə Avroliqanın qrup mərhələsinə vəsiqə qazandı...
- Şadam ki, mən də karyeramda üçüncü dəfə Avroliqanın qrup mərhələsində oynamaq şansı qazanıram. Bu, tarixi hadisədir. Çempionlar Liqasının qrup mərhələsində oynamaq istəyirdik. Amma Avroliqada oynamaq da yaxşıdır.
- Bu dəfəki uğurunuzu səciyyələndirən nədi?
- Bu mövsüm bəxtimiz gətirmirdi. Adətən, biz prinsipial oyunlarda son anda vacib qollar vururduq, qələbə qazanırdıq. Amma bu mövsüm hər şey əksinə idi. Şadam ki, "Qöteborq"la oyunda hər şey xeyrimizə oldu.
- Mətbuatın təzyiqi hiss olunurdu?
- Bəli, mətbuatın təzyiqi hiss olunurdu. Amma biz bundan faydalandıq. Bu, bizi daha da motivasiya edirdi.
- Avroliqanın qrupunda ÇL səviyyəli klublar - "Mançester Yunayted", "Fənərbaxça", "Roma" da var. Onlardan hansına qarşı oynamaq istərdiniz?
- Türkiyə klubu ilə. "Fənərbaxça"nın Azərbaycanda çoxlu azarkeşi var. İstərdim ki, görüm bizimlə qarşılaşanda azarkeşlər hansı komandaya azarkeşlik edəcəklər (gülür).