Məhəmməd Mirzəbəyov: Qarabağın ilk oyunda uduzduğunu eşidəndə çox məyus oldum
"Qəbələ"nin yarımmüdafiəçisi Məhəmməd Mirzəbəyovun azerisport.az saytına müsahibəsi
- Qarşıda sizi Sloveniya "Maribor"u ilə Avroliqanın cavab pley-off matçı gözləyir. Sizə elə gəlmir ki, cavab görüşündə ilk oyunda əldən qaçırdığınız qol epizodlarına görə təəssüf hissi keçirə bilərsiniz?
- İstənilən halda cavab matçına ciddi hazırlaşmalıyıq. Bizi ən vacib, ən çətin oyun gözləyir. Layiqli oyun göstərməliyik ki, heç nəyə görə təəssüflənməyək. Hər şeyin yaxşı olacağına ümidliyəm.
- İlk oyunda istədiyiniz nəticəni qazana bildiniz?
- Bəli, baş məşqçinin tapşırıqlarını eyrinə bildik. Fikrimcə, heç də pis alınmadı.
- "Qəbələ" ilk dəqiqələrdən hücumda olduğu halda niyə qapısında qol gördü?
- Qolu öz diqqətsizliyimiz ucbatından buraxdıq.
- Rəqib hesabı açanda nə düşündünüz?
- Biz bu oyundan öncə də, matçın gedişində də ancaq qələbə barədə düşünürdük. Hesabı xeyrimizə dəyişəcəyimizə inanırdıq. Buna da nail olduq.
- 3:1 hesabı "Qəbələ"nin mərhələ adlaması üçün yetərli ola bilər?
- İstənilən hesablı qələbə bizim xeyrimizədir. Amma sakitləşmək olmaz. "Maribor"a qarşı Sloveniyada oynamaq çətin olacaq.
- Rəşad Sadiqovsuz çətin deyildi?
- Şübhəsiz ki, Rəşad kimi liderin olmaması özünü dərhal göstərir. Allah eləsin ki, tezliklə sağalsın və bizə kömək etsin.
- "Maribor"la oyunun gözləniləndən asan keçəcəyini gözləyirdiniz?
- Gəlin tələsməyək. "Maribor" çox güclü komandadır. Sadəcə, biz ikinci hissədə çox aqressiv oynadığımız üçün qələbə qazandıq.
- Avroliqadakı digər təmsilçimiz "Qarabağ"ın İsveç "Qöteborq"una uduzacağını gözləyirdiniz?
- Oyundan sonra "Qarabağ"ın uduzduğunu eşidib çox məyus oldum. Amma cavab oyununda ağdamlı qardaşlarımızın qələbəsi üçün dua edəcəyik. Ümid edirəm ki, onlar Avroliqanın qrup mərhələsinə vəsiqə əldə edəcəklər.