Ruslan Qurbanov: Yeni hücumçularımıza vaxt lazımdır
"Neftçi"nin hücumçusu Ruslan Qurbanovun azerisport.az saytına müsahibəsi
- İki turdan sonra 3 xal toplamısınız. AZAL (2:0) və "Zirə"yə (0:1) qarşı oyunlarınızı necə şərh edərdiniz?
- Mövsümə yaxşı başladıq. Səfərdə AZAL-a qalib gəldik. Əlbəttə, iki turdan sonra 6 xalımızın olmasını çox istəyirdik. Amma təəssüf ki, "Zirə"yə məğlub olduq.
- Buna nə səbəb oldu?
- Sadəcə, bu matçda ələ düşən qol şanslarından yararlana bilmədik. Amma rəqib öz qolunu vurdu və qalib gəldi.
- İkinci hissədə Vəli Qasımov meydana üç forvard buraxmışdı. Sizdən fərqli olaraq, Denilsonla Tira ümumiyyətlə qapıya zərbə endirə bilmədi. Bu, onların komandaya uyğunlaşa bilməməsindən xəbər verir, ya başqa səbəb var?
- Onlara vaxt lazımdır. Ümid edirəm ki, hər ikisi komandaya faydalı olacaq. Sadəcə, bir qədər gözləmək lazımdır.
- "Neftçi" ötən mövsüm medalçılar sırasına düşə bilmədi. Bu mövsüm necə olacaq?
- Ötən mövsüm artıq geridə qalıb. Bu mövsüm ancaq uğurlu nəticələr barədə düşünürük. Medallar uğrunda mübarizə aparacağıq. Necə alınacağını isə zaman göstərəcək.
- Premyer Liqada 8 klubun iştirakı futbola marağı azaldıb?
- Çempionatda 16-20 komandanın iştirakını istəyərdim. Amma nə etmək olar? Görünür, belə lazımdır.
- "Neftçi" növbəti matçını "Qarabağ"a qarşı keçirəcək. 3 xal qazana biləcəksiniz?
- "Qarabağ"ın çox güclü olduğunu yaxşı bilirik. Amma niyə də onlara qalib gəlməyək? Meydana qələbə üçün çıxacağıq.
- "Neftçi" fanatları komandanın uğursuz çıxışına cavab olaraq, oyunlarınıza gəlməməyə qərar veriblər. Onların bu boykoti sizin üçün ikiqat zərbə sayıla bilər?
- Azarkeşlərimizi başa düşürəm. Onlardan uğursuz nəticələrə görə bir daha üzr istəyirəm. Amma onların dəstəyi sayəsində uğur qazana bilərik. Çox istərdim ki, azarkeşlərimiz "Qarabağ"la oyuna gəlib, bizə dəstək olsunlar. Bu, bizim üçün çox vacibdir.
- "Qarabağ"la "Qəbələ"nin Avropa Liqasının qrup mərhələsinə vəsiqə qazanmaq şansları barədə nə düşünürsünüz?
- Fikrimcə, hər iki komandamız buna nail ola bilər. Onların buna gücü də var. Hər iki təmsilçimizi qrup mərhələsində görməyi çox istərdim.