Mads Albek: Qarabağla cavab matçında əks-hücumlara bel bağlayacağıq
İsveçin "Qöteborq" klubunun yarımmüdafiəçisi Mads Albek Avropa Liqasının pley-off mərhələsi çərçivəsində "Qarabağ" üzərində 1:0 hesablı qələbə qazandıqları ilk oyundan sonra bəzi sualları cavablandırıb. Azerisport.az sizi həmin müsahibə ilə tanış edir:
- İlk dəqiqələrdən müdafiə olunmağa başladınız...
- Bəli. "Qarabağ" çox yaxşı komandadır. Onlar topla çox yaxşı rəftar edirlər. Buna görə də biz meydanda topsuz çox qaçmalı olduq. Hətta bəzən çox geri çəkilmək məcburiyyətində qalırdıq. Amma avrokuboklarda nəticə qazanmaq üçün düzgün taktika qurmaq önəmlidir. Ona görə də biz bu qələbəyə görə çox şadıq.
- Qol epizodundakı cərimə zərbəsi zamanı Emil Salomonssonla birgə idiniz. Necə razılığa gəldiniz?
- Onunla məsləhətləşirdik ki, hansımız vursa, daha yaxşı olar. Birinci hissədə o, cərimə zərbəsi vurmuşdu. Hiss edirdim ki, bu dəfə mənim vurmağım daha yaxşı olar. Xoşbəxtlikdən uğurlu alındı.
- Cərimə zərbələri üzərində çox çalışırsınız?
- Bəli. Yakob Ankersenlə tez-tez məşqdən sonra qalıb, qapıya zərbələr üzərində işləyirik. Şadam ki, bu dəfə alındı.
- Cavab matçından nə gözləyirsiniz?
- Cütün taleyinə hələ aydınlıq gəlməyib. Bakıda oynamaq bizə çox çətin olacaq. Çünki orada hava istidir. Rəqib də topa çox yaxşı nəzarət etməi bacarır. Müdafiədə çox diqqətli oynamalıyıq. Necə ki, ilk oyunun birinci hissəsində oynadıq. Yəqin ki, əks-hücumlara bel bağlayacağıq.
