Ruslan Abışov: Penalti yox idi
"İnter"in yarımmüdafiəçisi Ruslan Abışov Premyer Liqanın 3-cü turu çərçivəsində "Kəpəz"ə qarşı keçirdikləri oyundan sonra jurnalistlərin suallarını cavablandırıb. Azerisport.az sizi həmin cavablarla tanış edir:
- Matçla bağlı nə deyə bilərsiniz?
- Rəqibi doğma meydanda qəbul edirdik, buna görə qələbə qazanmaq istəyirdik. Penaltiyə qədər hər şey yaxşı idi. Amma penaltidən sonra bir qədər sakitləşdik. Toparlanmaq istəyirdik. Hakimlikdən danışmaq istəmirəm, amma onların bu günkü idarəçiliyi oyunumuza təsir etdi. Əsas odur ki, uduzmadıq.
- Üç oyuna üç qol vurmusunuz...
- Mən bu haqda yox, komandamızın uğuru barədə düşünürəm. Amma təbii ki, eyni zamanda qol vurmağım da yaxşıdır.
- "İnter" hesabı açandan sonra niyə pis oynamağa başladı?
- Razıyam. Amma qapımıza təyin olunan penalti düzgün deyildi. Orada penalti yox idi. Belə penalti hər kəsi ruhdan salar.
- Vurduğunuz qol maraqlı alındı. Özünüz o məsafədən qol vurmaq fikrində idiniz, ya təsadüfən alındı?
- Bəli, oradan zərbə vurmağa qərar verdim. Qol vurmaq istəyirdim.
- Oyunu izləyənlər arasında millinin baş məşqçisi Robert Prosineçki də var idi. Sizcə, vurduğunuz qolu bəyəndi?
- Fikrimcə, hə.