Yaşar Vahabzadə: Onlar Portuqaliyada özlərini göstərib, digər futbolçularımıza da yol aça bilərlər
Azərbaycanın 21 yaşadək futbolçulardan ibarət yığma komandasının baş məşqçisi Yaşar Vahabzadənin azerisport.az saytına müsahibəsi
- U-21-in üzvü Budaq Nəsirovun Portuqaliyanın "Sportinq" klubuna transferini necə qarşıladınız?
- Şadam ki, o, belə bir futbol ölkəsinin klubuna transfer oldu. Gənclərimiz artıq xarici ölkə klublarına keçməyə başlayıblar və bu, sevindirməyə bilməz. Budaq da çalışqan, aqressiv futbolçudur. Öz üzərində işləməyi sevir. O, bu tempdə davam etsə, Portuqaliya çempionatında oynaya bilər. Ondan öncə Elnur Cəfərov da "Tondela"ya keçmişdi. Bütün bunlar təbii ki, çox xoşdur.
- Sizcə, Nəsirov orada rəqabətə davam gətirə biləcək?
- O, dayaq yarımmüdafiəçisi mövqeyində oynayır. Bu mövqedə oynayan futbolçularda döyüşkən keyfiyyətlərin olması vacibdir. Budaq da bu, var. O, üzərində çalışmaqla daha da artıra bilər. Gəlin ona inanaq. Öz üzərində çalışmasından çox şey asılıdır. Bir daha qeyd etmək istərdim ki, Nəsirov zəhmətkeş oğlandır.
- Bəs Cəfərov barədə nə düşünürsünüz? Nəsirovun klubundan fərqli, "Tondela" favoritlərdən deyil...
- Elnura yoxlama oyunlarının demək olar ki, hamısına şans verdilər. Baş məşqçi onu meydana buraxırsa, deməli, bu futbolçunun perspektivinə inanır. Futbolçumuz ora gedibsə, sübut etməlidir ki, heç kimdən zəif deyil.
- Yetirmələrinizdən daha hansıları ölkə xaricində oynamağa hazır hesab edirsiniz?
- Belə uşaqlar var, az deyil. Ayrı-ayrılıqda ad çəkmək istəmirəm. Kimisə unuda bilərəm. Xaricə gedən futbolçularımız ikiqat əzmlə çalışmalıdırlar ki, digər azərbaycanlı oyunçulara da yol açsınlar. Bu işdə menecerlərdən də çox şey asılıdır. Gənclərimizi ölkə xaricində daha yaxşı reklam etmək, tanıtmaq lazımdır. Bu iki futbolçumuz Portuqaliyada özlərini doğrulda bilsələr, digər futbolçularımıza da maraq artacaq.
- Sizcə, bizim gənc futbolçularımız Avropadakı həmkarlarından nədə geri qalır?
- Düşüncə tərzində. Bizim futbolçular meydanda qərar verməyə gecikirlər. Bu, çox vacib keyfiyyətdir. Digər komponentlərdə elə də geri qalmırıq.
- Sizə elə gəlmir ki, futbolçularımızda həm də inamsızlıq var?
- Həmişə futbolçularıma deyirəm ki, səhv etməkdən qorxmayın, nəyisə etmək istəyirsinizsə, bunu edin. Səhv etmək qorxusu çox pis şeydir. Bu, özünəinamı azaldır, futbolçuda meydanda çox şey alınmır.