Roman Qriqorçuk: Sabah futbol bayramının əsas qəhrəmanı olmaq istəyirik
"Qəbələ"nin baş məşqçisi Roman Qriqorçuk Avropa Liqasının üçüncü təsnifat mərhələsi çərçivəsində Fransanın "Lill" klubuna qarşı keçirəcəkləri ilk oyun öncəsi mətbuat konfransında fikirlərini bölüşüb. Azerisport.az sizi ukraynalı mütəxəssisin açıqlamaları ilə tanış edir.
- Komanda uzun yolçuluqdan sonra hansı vəziyyətdədi?
- Uçuş barədə danışmağın mənası yoxdur. Bunu artıq unutmuşuq. Oyuna qədər hər şey qaydasında olacaq. Komandada vəziyyət yaxşıdır. Buna tam əminəm.
- Rəqib baş məşqçi "Lill"in 70 faiz hazır olduğunu dedi. "Qəbələ" belə bir rəqibə qalib gələcək gücdədir?
- Onlar 30 faiz hazır olsaydılar, daha yaxşı olardı. O zaman bu, bizi qane edərdi. 70% hazır olan "Lill" isə bizim üçün böyük gücdür.
- Oyun kiçik stadionda keçiriləcək. Bis siz hansı arenada oynamaq istərdiniz?
- Əlbəttə, əsas stadionda oynamağımızı istərdim. Daha güclü futbol atmosferində çıxış etməyi hər kəs arzulayır. Amma digər stadionda da əsl futbol bayramı yaşanacağına əminəm. Biz öz növbəmizdə sabahkı bayramın əsas qəhrəmanı olmaq istərdik.
- "Qarabağ" ötən gün güclü rəqibi ilə oyunda bütün oyunu demək olar ki, müdafiədə keçirdi. "Qəbələ"nin də sabah belə oynayacağını gözləmək olar?
- Həmin oyuna tam baxmamışam, sadəcə, epizodlarını gördüm. Ona görə də "Qarabağ"ın oyununa qiymət verə bilmərəm. Ağdam klubuna sadəcə, növbəti mərhələyə vəsiqə qazanmağı və ÇL-in qrup mərhələsində oynamağı arzulayıram. Biz isə müdafiədə oturmağı planlaşdırmırıq. Biz də hücum etmək istəyirik. "Lill" ilə ilk oyunun nəcitəsi məhz bizim hücumda necə oynamağımızdan asılı olacaq. Düzgün, səliqəli, güclü oynamalıyıq.
- Rəqib barədə nə bilirsiniz, ən çox nədən çəkinirsiniz?
- Məncə, az məlumat toplamamışıq. Ehtiyatlanmaq? "Lill" güclü komandadı. Rəqib böyük sürətə malik yaxşı oyunçulara malikdir.
- Bu iki komandanı müqayisə etsək, hansı üstünlükləriniz və ya çatışmazlıqlarınız var?
- Bunu deyə bilmərəm. Mənə öz komandamı rəqiblərlə müqayisə etmək çətindir. Komandamdan razıyam. Qısa müddət ərzində böyük işlər görmüşük. Sabahkı oyun da bizim üçün bir testdir. Çoxdan idi belə sürətli rəqiblərə qarşı oynamırdıq. Başa düşürəm ki, çox çətin olacaq.