Musayev: Jurnalistlərə şərait yaradılmayan stadionlar cərimə olunacaq
PFL prezidenti Ramin Musayev Azərbaycan çempionatının yeni mövsümünün püşkatma mərasimindən sonra mətbuat konfransı keçirib. Azerisport.az sizi həmin açıqlamalarla tanış edir.
- Çempionatda legioner limitinin dəyişməsinə nə mane olur?
- Əsas məqsədimiz milli komadaya düşəcək oyunçular üzə çıxarmaqdı. Səviyyəsi aşağı olan legionerlərin gətirilməsi və yerli oyunçuların yolunu açmaq üçün limit tətbiq olundu. Əvvəllər 20 000 manat rüsum ödənilirdi. Sonuncu çempinatda belə nəticə çıxardıq ki, pul az olanda, məsuliyyət çox olurmuş. Görsək ki, yetərincə yerli oyunçu var, ondan sonra limit dəyişəcək.
- İlk Azərbaycan çempionatı 26 klubla keçirilib. İndi isə cəmi 8 klub qalıb...
- Keyfiyyətsiz komandalardansa, 8 normal olanı yaxşıdı. Bu mövsüm avrokuboklara vəsiqə qazanan bütün klublarımız mərhələ adladı. Növbəti ildə də görəcəksiniz ki, 8 klubla çempionat keçirməklə heç nə itirməmişik.
- “CBC Sport” klublara bu mövsüm teleyayıma görə nə qədər pul ödəyəcək?
- Bu, kommeresiya sirridir. "Topaz"la da əməkdaşlığı davam etdirəcəyik. Yeni layihələrimiz olacaq. Jurnalistlər də bu layihələrə öz töhfələrini verə bilərlər. Yeri gəlmişkən, yeni mövsümdən jurnalistlər üçün stadionlarda hər bir şərait yaradılmasa, cərimələr tətbiq olunacaq.
- Neçə top gətirilib, qiyməti neçəyədir və klublara nə qədər veriləcək?
- 1000 ədəd top sifariş etmişik. 200-ü artıq gəlib. Qiyməti isə yol xərci ilə birgə 70 avrodur. Halbuki, real qiyməti 160 avrodur. Amma biz qiyməti aşağı sala bildik.
- Əlavə sponsor axtarırsınız?
- Çempionat üçün yox, kubok üçün sponsor axtarırıq.
- Birinci divizionla bağlı vəziyyət nə yerdədir?
- Çempionat sentyabrın 15-də başlayacaq. Hazırda 12 komanda var. Bildirmişik ki, ən azı 200 min manat bank zəmanəti olmalıdı. Premyer Liqaya Lisenziyalaşdırma qaydalarına riayət edənlər buraxılacaq. Ağır çempionat olacaq. Həm də maraqlı. “Qızıl oyun” olmayacaq. Hazırda bu təcrübədən Moldovadan başqa heç yerdə istifadə olunmur.