Tadas Simaitis: Avropa Liqası bizim üçün böyük təcrübə oldu
"Kəpəz"in qapıçısı Tadas Simaitisin azerisport.az saytına müsahibəsi
- "Kəpəz" Avropa Liqasının ikinci təsnifat mərhələsi çərçivəsində Avstriya "Admira"sına hər iki oyunda uduzaraq, mübarizəni dayandırdı. Bu uğursuzluğa nə səbəb oldu?
- Pis oynamadıq. Sadəcə, bir az bəxtimiz gətirmədi. Həm də "Admira" necə güclü komanda olduğunu göstərdi. Fikrimcə, Bakıda Avstriyadakından daha yaxşı çıxış etdik. Bəxtsizlikdən əlavə, uşaqlarda yorğunluq da var idi. Qol buraxdıqdan sonra isə bizə daha da çətin oldu. Amma biz sonadək var gücümüzlə mübarizə apardıq.
- Sanki "Kəpəz"in oyunçularında inamsızlıq var idi...
- Mən belə düşünmürəm. Sadəcə, "Admira"ya qarşı açıq futbol oynamaq olmazdı. Diqqətli çıxış etməyə məcbur idik. Qol buraxmamağa çalışırdıq. Amma bu vəzifənin öhdəsindən gələ bilmədik.
- Səfərdəki oyundan sonra çox yorğunluq vardı?
- Bəli, yorğunluq var idi. Amma eyni sözləri rəqib haqda da demək olar. Sadəcə, Avstriya klubu əks-hücumlarda çox yaxşı təsir bağışlayırdı. Elə bundan da yararlanıb, bizə qalib gəldilər. Belə sürətli futbol sərgiləyən komandaya qalib gəlmək asan məsələ deyildi.
- "Kəpəz"ə bu dəfə sanki Adlan Şişxanov (Moldovanın "Daçiya" klubunun baş meneceri) kimi rəqib klub rəsmisi lazım idi ki, motivasiyanız daha güclü olsun...
- (gülür) Şişxanov kimi, "Admira"nın da prezidenti mənim üçün maraqlı deyildi. Mənim üçün daha çox öz oyunumuz vacibdir. Yeri gəlmişkən, "Admira" elə bir komandadır ki, aşkar lideri yoxdur. Ulduz futbolçusu olmasa da, çox yaxşı komplektləşmiş heyəti var. Mənə elə gəlir ki, "Admira" hətta Çexiya "Slovan"ını da keçəcək.
- Buraxdığınız hər iki qol demək olar ki, oxşar idi...
- Bəli, hər iki qolu rəqib futbolçular təkbətək çıxıb vurdular. Komandama kömək etmək üçün əlimdən gələni etdim. Amma belə epizodlarda qapıçıya çox çətin olur.
- "Kəpəz" avrokuboklara görə mövsümə tez başlamışdı. Bunun Premyer Liqanın yeni mövsümündə sizə faydası çox olacaq, ya ziyanı?
- Mənə elə gəlir ki, bu, ancaq xeyrimizə işləyəcək. Çempionat öncəsi belə çətin oyunlar keçirdik. İstirahət üçün az vaxtımız var. Sonra yenidən hazırlığa başlayacağıq. Avropa Liqası bizim üçün böyük təcrübə oldu.
